Amnesty International կազմակերպութեան Արեւելեան Եւրոպայի եւ Կենտրոնական Ասիայի տնօրէն Մարի Ստրութերսն արձագանքել է Բաքւում Լեռնային Ղարաբաղի նախկին պետնախարար Ռուբէն Վարդանեանի դատաւարութեան մեկնարկին:
«Ադրբեջանի իշխանութիւնները պնդում են, որ Ռուբէն Վարդանեանին դատարանի առջեւ են կանգնեցրել՝ պատասխանատուութեան ենթարկելու այն յանցագործութիւնների համար, որոնցում նրան մեղադրում են։ Բայց նրան զրկելով արդար դատաքննութեան իրաւունքներից՝ նրանք արդարադատութեան ճիշտ հակառակն են անում։ Իշխանութիւնները պէտք է պաշտպանէն եւ ապահովէն Ռուբէն Վարդանեանի արդար դատաքննութեան իրաւունքները։
Ռուբէն Վարդանեանը լուրջ մեղադրանքներ է բարձրաձայնել մարդու իրաւունքների խախտումների մասին, այդ թւում՝ կալանքի ժամանակ վատ վերաբերմունքը, կեղծուած գործի նիւթերը ստորագրելու հարկադրանքը եւ պաշտպանութիւնը նախապատրաստելու հնարաւորութիւնից զրկումը։ Իշխանութիւնները պէտք է անյապաղ, մանրակրկիտ, անկախ, անաչառ եւ արդիւնաւետ կերպով հետաքննէն այս ծանր մեղադրանքները եւ պատասխանատուութեան ենթարկէն նրանց, ովքեր կասկածւում են որպէս այս ամէնի պատասխանատու:
Իշխանութիւնները պէտք է Ռուբէն Վարդանեանին տրամադրէն լիարժէք հասանելիութիւն իր փաստաբանների հետ շփման, ինչպէս նաեւ բաւականաչափ ժամանակ ու հնարաւորութիւն՝ պաշտպանութիւնը նախապատրաստելու համար:
Միջազգային հանրութիւնը պէտք է ուշադրութեամբ հետեւի այս աղմկահարոյց գործին՝ Ռուբէն Վարդանեանի արդար դատաքննութեան իրաւունքն ու արդարադատութիւնն ապահովելու համար», — ասել է Մարի Ստրութերսը:
