Հայ-ադրբեջանական սահմանին գիշերն էական միջադէպեր չէն արձանագրուել: «Արմենպրես»-ի փոխանցմամբ, այս մասին յայտնել է ՀՀ ՊՆ մամուլի քարտուղար Արամ Թորոսեանը՝ ներկայացնելով իրավիճակը ժամը 08։30-ի դրութեամբ։
Հայաստանի անվտանգութեան խորհրդի քարտուղար Արմէն Գրիգորեանը սեպտեմբերի 14-ին յայտնել էր, որ միջազգային հանրութեան ներգրաւուածութեան շնորհիւ յաջողուել է ձեռք բերել հրադադարի պայմանաւորուածութիւն։
«Բնականաբար, առանց պայմանաւորուածութեան հնարաւոր չէր հրադադար ունենալ: Յուսանք, որ Ադրբեջանը կը շարունակի պահպանել այդ հրադադարը», — ասաց Գրիգորեանը:
Միւս կողմից «Ադրբեջանը Հայաստանին միակողմանի մարդասիրական հրադադար հաստատելու առաջարկ է ներկայացրել», — չորեքշաբթի երեկոյեան Բաքւում յայտարարել է Ադրբեջանի արտգործնախարար Ջեյհուն Բայրամովը։ Ադրբեջանական դիւանագիտութեան ղեկավարն այս մասին նշել է Ռուսաստանի նախագահի միջազգային մշակութային համագործակցութեան գծով բանագնաց Միխայիլ Շուիդկոյի հետ հանդիպման ժամանակ։ «Մեր երկիրը շահագրգռուած չէ իրավիճակի ապակայունացման եւ սրման մէջ», — ասել է նա։
Հայաստանի ԱԳՆ խօսնակն «Ազատութեանը» փոխանցել էր, որ այդ պահի դրութեամբ նման առաջարկի վերաբերեալ տեղեկութիւններ չունեն։
Չստուգուած լուրերի համաձայն Վարդենիսի աւագանու «Միասնական Վարդենիս» խմբակցութեան ղեկավար Դաւիթ Շահնազարեանը News.am-ի հետ զրոյցում ասել է՝ «Հրադադարը» տեւել է մօտ մէկուկէս ժամ, որից յետոյ հրետակոծութիւնը վերսկսուել է Սոթքի, Կութի, Նորաբակի ուղղութեամբ. այս համայնքները կրկին հրետանային միջոցներով թիրախաւորուել են: «Մեկ ժամ առաջ խախտեցին հրադադարը, եթէ, իհարկէ, կարելի է հրադադար անուանել։ Բնակիչներ կան, որոնք պատսպարուել են, բայց հիմնականում տարհանուել են։ Կութ գիւղի եզրին գտնուող մէկ տուն է վնասուել, բարեբախտաբար, տանը մարդ չի եղել։ Նորաբակում վնասուած տներ չկան, իսկ Սոթքի վերաբերեալ դժուար է գնահատական տալ, որովհետեւ այս պահին թիրախային հրետակոծութիւն է տեղի ունենում, իսկ այդ ժամուկէսն էլ, որ կիսահրադադարային վիճակ էր, հնարաւոր չի եղել վնասի չափը գնահատել, բնականաբար, ամենաշատ վնասները հէնց Սոթքում են եղել»,– ասել է Վարդենիսի աւագանու անդամը։
