Սիրելի հայրենակիցներ,
Աւարտին է մօտենում 2022 թուականը։ Տարեմուտը, սովորաբար, անցնող տարին ամփոփելու, նոր յանձնառութիւններ նախանշելու, նաեւ բարեմաղթութիւնների առիթ է։
Ցաւօք, 2022-ը չեղաւ համազգային ձեռքբերումների, խաղաղութեան ու պետականութեան ամրապնդման տարի։ Երկիրը շարունակում է դիմագրաւել անյաղթահարելի դարձած եւ օրէցօր խորացող անվտանգային եւ գոյութենական մարտահրաւէրներ։ Կորցրած տարածքային ամբողջականութեան պայմաններում երկրի քաղաքական ղեկավարութիւնը ոչ միայն չի կարողանում երաշխաւորել Հայաստանի անվտանգութիւնն ու ինքնիշխանութիւնը, այլեւ հրաժարւում է Արցախի Հանրապետութեան անվտանգութեան երաշխաւորը լինելու իր սահմանադրական յանձնառութիւնից։
Յենց այս պահին Արցախի 120 հազար մեր քոյրերն ու եղբայրները դիմագրաւում են ագրեսոր Ադրբեջանի կողմից իրականացուող բացայայտ ցեղասպանական գործողութիւնը՝ արդէն քսան օր ձգուող, մարդասիրական ծանրագոյն ճգնաժամ առաջացրած շրջափակումը։
44-օրեայ պատերազմից երկու տարի անց, մեր անանց ցաւերին եւ անդառնալի կորուստներին գումարւում են նորերը․ թշնամու սեպտեմբերեան երկօրեայ ագրեսիայի զոհ դարձած աւելի քան 200 զինուորներից ոմանք դեռեւս չէն գտել իրենց հանգիստը հայրենի հողում։ Հազարաւոր ընտանիքներ ապրում են որդիների կորստի, տասնեակ հազարներ՝ իրենց հարազատ բնօրրանի կորուստն ապրող փախստականի վշտով, տասնեակներ՝ գերեւարուած որդիների վերադարձի յոյսով։
Այս ցաւալի իրականութեան մէջ՝ մի կողմից շարունակւում է Հայաստանի արտաքին մեկուսացումը, միւս կողմից՝ թուրք-ադրբեջանական բացայայտ ռազմատենչ հռետորաբանութիւնն ու իրական ագրեսիան, որին ՀՀ իշխանութիւնը համարժէք պատասխան տալու ո՜չ կամք եւ ոչ էլ՝ կարողութիւն ցոյց չի տալիս։
Նոյնքան աղէտալի է երկրում խորացող ներազգային պառակտումը, անստոյգ հեռանկրով պայմանաւորուած ծանր բարոյահոգեբանական մթնոլորտը։ Խորացող արտաքին մարտահրաւէրների կողքին շարունակւում է երկրի ինստիտուցիոնալ կազմաքանդումը՝ ժողովրդաւարութեան բացայայտ նահանջները, ռեպրեսիւ գործիքակազմի որդեգրումը, քաղքական հալածանքներն ու իշխանութեան իւրացումը։
Մեր պետականութեան եւ մէզանից իւրաքանչիւրի համար շարունակուող այս վայրէջքը կասեցնելու, Հաեօց պետականութեանն ու Արցախ աշխարհին ուղղուած ծանրագոյն մարտահրաւէրները դիմագրաւելու, խորացող ներքին բաժանարարներն ու երկրի ապագայ գահավիժումը կասեցնելու քաղաքական պատասխանատուութեամբ եւ յանձնառութեամբ՝ ընդդիմադիր այլ քաղաքական ուժերի հետ միասնաբար 2022-ին ՀՅ Դաշնակցութիւնն իր շարքերի անմնացորդ նուիրումով յունաւորեց Դիմադրութեան շարժումը։
Հազարաւոր մեր հայրենակիցներ՝ ընդդիմադիր քաղաքական ուժերի առաջնորդութեամբ ոտքի կանգնեցին՝ ամիսներ շարունակ աննահանջ մնալով իրենց համոզումներում՝ վստահ լինելով, որ միայն ազգային միասնականութեամբ եւ համազգային պայքարով է հնարաւոր շրջել մէզ պարտադրուող ուրացումը, փոխել խաղի նուաստացուցիչ կանոնները, ձեւաւորել իրապէս ազգային յանձնառութիւն ունեցող իշխանութիւն, իրական խաղաղութիւն։
Մենք միասին հնարաւորութիւն ունէինք այդ անպատուաբեր ու նուաստացուցիչ ընթացքը կասեցնելու, ուղղելու մեր պետականութեան խաթարուած ողնաշարը, վերագտնելու մեր արժանապատուութիւնն ու ամրացած ոգով կանգնեցնելու պարտութիւնների կործանարար շղթան։
Մեր հաւաքական պայքարն առայժմ համեստ ձեռքբերումներով է նշանաւորուել, բայց մեր ժողովրդի պատմական իղձերը կեանքի կոչելու մեր յանձնառութիւնն ու ժողովրդի պահանջն աննահանջ է։ Դա պետականութիւն ունենալու, արժանապատիւ ապրելու եւ արարելու մեր հաւաքական չիրացուած օրակարգն է։
Առջեւում մէզ մեծ փորձութիւններ են սպասում, աշխարհաքաղաքական վերադասաւորումների այս փոթորկոտ ժամանակներում իրաւունք չունենք կորցնելու մեր զգօնութիւնը։
Ստեղծուած փակուղային իրավիճակում մէզ աւելի քան ազգային միասնականութիւն է անհրաժեշտ, ազգային պետականութեան նոր բովանդակութեան եւ տեսլականի սահմանում։ Մենք պարտաւոր ենք ելքեր գտնել՝ դիմակայել արտաքին մարտահրաւէրները, ամրացնել մեր երերացող պետականութիւնը։ Մեր ուժականութեան աղբիւրը Հայաստան-Արցախ-Սփիւռք միասնականութեան մէջ է։
Սիրելի հայրենակիցներ,
Շնորհաւոր Ամանոր եւ Սուրբ Ծնունդ:
Թող 2023թ․ սէր, համերաշխութիւն եւ իրական խաղաղութիւն բերի մեր բոլորի ընտանիքներին, լինի զօրացման ու վերածննդի տարի։
Ազգային միասնականութեամբ լծուէնք մեր պետականութիւնը պաշտպանելու եւ մեր ազգային օրակարգերը կեանքի կոչելու գործին։
ՀՅԴ Հայաստանի Գերագոյն մարմին
31.12.2022, Երեւան
