Այս օրերին, երբ Հայաստանի Հանրապետութիւնն ու Արցախի Հանրապետութիւնը անվտանգային լրջագոյն մարտահրաւէրների են դիմագրաւում, երբ աշխարհաքաղաքական զարգացումներն ու տարածաշրջանային լարուածութիւնն ամէն պահի լի են նոր, անկանխատեսելի սպառնալիքներով, երկրի անվտանգութիւնն ամրապնդելու, ՀՀ Զինուած ուժերը վերակազմաւորելու, համակարգային բարեփոխումներ իրականացնելու, Հաեօց բանակի եւ հայ ժողովրդի մարտական ոգին վերականգնելու փոխարէն, Հայաստանի իշխանութիւնները շարունակում են հերթական նախաձեռնութեամբ փոշիացնել եղած ներուժը։
Իշխանութիւնների կողմից հանրային քննարկման ներկայացուած «Զինուորական ծառայութեան եւ զինծառայողի կարգավիճակի մասին» օրէնքում փոփոխութիւններ եւ լրացումներ կատարելու մասին» ՀՀ օրէնքի նախագիծը հեռուն գնացող ծանր հարուած է երկրի անվտանգային միասնական համակարգին, հանրային համերաշխութեանը, Հայրենիքի նկատմամբ համաժողովրդական նուիրուածութեանն ու մէզ համար կենսական «Ազգ-բանակ» գաղափարին։
Իրականում սա մեր մեծագոյն ձեռքբերումներից մէկի՝ Արցախեան Ազատամարով, հազարաւոր հայ նուիրեալների կեանքի եւ համազգային նուիրումի գնով կեանքի կոչուած՝ համաժողովրդական Բանակի գաղափարի մերժումն է, մեր պետականութեան հեռանկարը կասկածի դնող քայլ։
Ըստ էութեան, խոշոր գումարի դիմաց վերացւում է ՀՀ Սահմանադրութեամբ ամրագրուած պարտադիր զինուորական ծառայութեան համակարգը, է՛լ աւելի թուլացնելով 44-օրեայ պատերազմին յաջորդած հանրային եւ պետական դիմադրողականութիւնը։ Մեր ազգային եւ պետական շահերին հակասող սոյն հակասահմանադրական նախագծով իշխանութիւնները խորացնելու են ներազգային պառակտումն ու սոցիալական բեւեռուածութիւնը, երկրում ձեւաւորելով ոչ հաւասար իրաւունքներով եւ պարտականութիւններով հանրային շերտեր։
Արձանարգելով, որ փաստարկուած ներկայացրել ենք եւ շարունակելու են բարձրաձայնել այս նախաձեռնութեան վտանգաւորութիւնը, ՀՅԴ Հայաստանի Գերագոյն Մարմինը վերահաստատում է իր աներկբայ վերաբերմունքը Հայաստանի Հանրապետութեան անվտանգութեան գլխաւոր երաշխաւոր ՀՀ զինուած ուժերի համաժողովրդական, բոլորի համար պարտադիր զինապարտութեամբ համակարգի պահպանման հարցում։
Կոչ ենք անում հանրային լայն շրջանակներին, մեր ողջ հասարակութեանը ընդդիմանալ երկիրը հետեւողականօրէն կազմաքանդման տանող այս իշխանութիւններին, նրանց ապազգային նախաձեռնութիւններին, թոյլ չտալ երկիրը զրկել պաշտպանութեան, իսկ նրա քաղաքացիներին սեփական Հայրենիքում արժանապատիւ, անվտանգ եւ խաղաղ ապրելու հեռանկարից։
Միասին կարոյ՛ղ ենք։
ՀՅԴ Հայաստանի Գերագոյն մարմին
26․08․2022 թ.
