Օգոստոսի 22-ին ՀՅԴ ԳՄ ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթելեանը հարցազրոյց է տուել «Երկիր Մեդիայ», «Հ2» եւ «5-րդ Ալիք» հեռուստաընկերութիւններին:
Ինչ արդիւնքներ է տուել «Դիմադրութիւն» շարժումը, ամենակարեւորը դրա վառ գնահատականը եւ ապացոյցը միջազգային արձագանքն է։
Թուրքիայի ԱԳ նախարարը երեք անգամ անդրադարձել է «Դիմադրութիւն» շարժմանը տարբեր հարցազրոյցներով եւ յայտարարութիւններով եւ ՀՀ ընդդիմութեան գործունէութեանը հիմնականում այս կոնտեքստում, որ Հայաստանում կան ռեւանշիստական ուժեր, ովքեր խանգարում են Նիկոլ Փաշինեանին՝ տարածաշրջանում խաղաղութիւն հաստատել, այսինքն այս կեղծ օրակարգով Ադրբեջանի եւ Թուրքիայի շահերը սպասարկելուն. հարցազրոյցի ժամանակ ասել է Իշխան Սաղաթելեանը։
«Այս մասին յայտարարութեամբ հանդէս է եկել Ադրբեջանի նախագահը, Ադրբեջանի ԱԳ նախարարը։ Ամենացայտուն օրինակը՝ Ադրբեջանի անվտանգութեան ծառայութեան պետի յայտարարութիւնը, որն ուղիղ սպառնում էր ՀՀ ընդդիմութեանը։ Շարժմանը շատ կարեւոր գնահատական էր Ադրբեջանում ԱՄՆ նախկին դեսպանի յայտարարութիւնը, այսինքն առնուազն այս իմաստով մենք ամբողջ աշխարհին ցոյց ենք տուել, որ կայ գործընթաց, խախտել ենք երկիրը յանձնելու ժամանակացոյցը։ Այս աղէտը, որը այս օրերին ունենք, դա նախատեսուած էր աւելի վաղ եւ աւելի մեծ ծաւալներով։Հետեւաբար այս իմաստով ակնյայտ է Դիմադրութեան շարժման ձեռքբերումները։ Մենք մեր գլխաւոր նպատակին՝ հեռանցել օրուայ իշխանութեանը եւ կանխել այս գործընթացը, դեռ չենք հասել, բայց վստահ եմ՝ մեր բացթողումները, սխալները գնահատելով, ճիշտ եզրահանգնումներ անելով հնարաւոր է հասնել այս իշխանութիւնների հեռացմանը։ Կարեւորը՝ չյուսահատուել, չնահանջել։ Իսկ այն շոգ, ձմեռ եւ այլն․․․ Հայրենիքի փրկութեան շարժման ժամանակ, վրանները նոր տարուն հրապարկում խփուած էին, նոյնիսկ նոր տարին մենք հրապարկում ենք դիմաւորել, այդ հարցերին մենք անդրադարձել ենք, եւ կեանքը ժամանակը ապացուցել է, որ մենք որեւէ պարագայում հետ չենք կանգնելու»,-ասաց նա։
Անդրադառնալով շարժման բացթողումներին, քննադատութիւններին, թէ չունէին ծրագիր եւ վարչապետի թեկնածու, Իշխան Սաղաթելեանը նշել է․
«Մենք մեր ծրագրերի մասին խօսել ենք շատ յստակ ու ոչ թէ մէկ անգամ այլ բազմաթիւ անգամներ։ Այս պայքարը մեր համար նախընտրական պայքար չի եղել․․․ մենք ասել ենք, որ երկիրը, պետականութիւնը վտանգի տակ է։ Այս իրավիճակում, երբ ունենք գոյաբանական խնդիրներ, այս պայքարը վերածել նախընտրական պայքարի, եւ հանդէս գալ նման դէտալային ծրագրերով կամ խօսել սոցիալական հարցերի մասին, երբ առհասարակ պետականութեան գոյութիւննն է հարցականի տակ, մենք այդ սկզբունքով չենք առաջնորդուել։ Ծրագրային ելոյթներ ունեցել ենք բազմաթիւ անգամներ»։
