Մեր ունեցած տեղեկութիւններով, առաջիկայում իշխանութիւնները նոր ոգեւորութեամբ ու «էնտուզիազմով» են տեղեկատուական դաշտ բերելու ապօրինի գոյքի բռնագանձման թեման։ Հանրային տրամադրութիւնների վրայ ազդեցութեան տեսանկիւնից բաւական «շահեկան» այս թեման «գովազդելու» առաջադրանքը դրուած է իշխանութիւններին ծառայող, արեւմուտքից սնուող սատելիտների վրայ, իսկ համապատասխան մարմինները կը փորձեն նորանոր «նիւթեր» տալ դրա համար:
Մեր աղբիւրների փոխանցմամբ, որպէսզի պատկերն աւելի համոզիչ, աւելի փիառային տեսք ստանայ, օրերս նոր ցուցում է իջեցուել, ի մասնաւորի՝ յանձնարարուել է ապօրինի գոյքի բռնագանձման գործընթացում առանձնայատուկ ուշադրութիւն դարձնել ՀՀ-ում գործող կուսակցութիւնների ֆինանսական աղբիւրների ուսումնասիրութեանը։
Նոյն աղբիւրները փոխանցում են, որ համապատասխան կառոյցում առանձին խումբ է ստեղծուած, որի բուն պարտականութիւնը կուսակցութիւնների ֆինանսական հոսքերի ուսումնասիրութիւնն է։ Ի դէպ, մենք տեղեկութիւն ունենք, որ առաւել մեծ ուշադրութեան են արժանանալու արտէրկրից եկող դրամական միջոցները։
