ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: Նիկոլ Փաշինեանը պարզաբանել է, թէ ինչ է նկատի ունեցել, երբ յայտարարել է, որ Լեռնային Ղարաբաղի հակամարտութեան կարգաւորման բանակցային գործընթացը սկսում է զրոյական կէտից։
«Արմենպրես»-ի հաղորդմամբ՝ Փաշինեանն այդ մասին խօսեց ԱԺ-ում «Հայաստանի Հանրապետութեան կառավարութեան ծրագրի (2021-2026 թթ.) 2022 թուականի կատարման ընթացքի եւ արդիւնքների մասին» զեկոյցի քննարկմանը՝ անդրադառնալով «Հայաստան» խմբակցութեան պատգամաւոր Ագնեսայ Խամոյեանի հարցին:
Խամոյեանը տեսակէտ յայտնեց, որ նախորդ երեք իշխանութիւնների ժամանակ բանակցուած ցանկացած փաստաթուղթ, եթէ կեանքի կոչուեր, շատ աւելի լաւն էր լինելու, քան կայ գործող իշխանութեան կառավարման արդիւնքում: Նրա հարցը Փաշինեանի դիրքորոշումների փոփոխութեան մասին էր:
«Դուք ասացիք, որ իմ բանակցած փաստաթղթի մասին բան չեմ ասել, շատ ճիշտ եք ասում, որովհետեւ ես չեմ հասցրել բանակցել, ես բան չեմ բանակցել, որ փաստաթուղթ յայտնուի սեղանին: 2019 թուականի ամռանը սեղանին դրուած փաստաթուղթը ինձնից առաջ բանակցութիւնների արդիւնքների ամփոփումն է»,-ասաց Փաշինեանը՝ դիմելով Խամոյեանին:
Նա նշեց՝ ինքնորոշման հետ կապուած իր վերաբերմունքը հէնց սկզբից է փոխուել: Վարչապետը յայտարարեց, որ 2019 թ մարտին ԼՂ եւ ՀՀ անվտանգութեան խորհուրդների համատեղ նիստում ինքն ասել է նոյն բանը, ինչ հիմա է ասում:
«Այն ժամանակ պարզ է՝ այլ բառապաշարով եմ ասել: Եւ այն ժամանակ է, որ ինքնորոշման իրաւունքի նկատմամբ իմ վերաբերմունքը ոչ թէ փոխուել է, այլ ես կարդացել, տեսել եմ, թէ դա ինչի մասին է: Ինքնորոշման իրաւունքի այն կոնցեպտը, որը դրուած է եղել 2007 թուականին, այն է, որ մինչեւ Լեռնային Ղարաբաղը չճանաչուի Ադրբեջանի մաս, ինքնորոշման իրաւունքը չի կարող իրացուել հէնց ձեր ձեռք բերած պայմանաւորուածութիւններով»,-ասաց Փաշինեանը:
Խամոյեանը յիշեցրեց՝ Փաշինեանն ինքն է 2019-ին յայտարարել, որ բանակցութիւնները սկսել է սեփական զրոյական կէտից: Ըստ պատգամաւորի՝ պատերազմից յետոյ է միայն պարզուել, որ 2019-ին բանակցութիւնների սեղանին փաստաթուղթ է եղել, թաքցուել են բանակցային գործընթացի նրբութիւնները:
Վարչապետը, անդրադառնալով զրոյական կէտի վերաբերեալ դիտարկմանը, ասաց, որ այդ նոյն ելոյթում 2019 թուականի մարտին հրապարակային է առաջարկել հասկանալ, թէ Մադրիդեան սկզբունքներն ի՞նչ է, այս սկզբունքներով ԼՂ-ն կարո՞ղ է ինքնորոշուել, կարո՞ղ է չլինել Ադրբեջանի կազմում:
«Սրա մասին հրապարակային էլ եմ խօսել, որից յետոյ ստացել եմ պատասխան՝ աեօ, եթէ Ադրբեջանը համաձայնուի: Սա է զրոյական կէտը»,-ասաց վարչապետը:
Ըստ Փաշինեանի՝ իր սխալն այն է, որ ինքն այն ժամանակ պէտք է այդ բանակցային թղթերը ցոյց տար, ասէր, որ հասել են այդ կէտին, տարբերակ չունեն: «Այ դրա համար ինձ արժէ դատել, որ չեմ եկել, ասել, որ այս խաղն աւարտուած խաղ է: Այ դա իմ սխալն է»,-ասաց Փաշինեանը:
