ՍՏԵՓԱՆԱԿԵՐՏ, 2 ԱՊՐԻԼԻ, ԱՐՄԵՆՊՐԵՍ։ Արցախի Հանրապետութեան արտաքին գործերի նախարարութիւնը յայտարարութիւն է տարածել Ադրբեջանի կողմից սանձազերծուած ապրիլեան քառօրեայ պատերազմի 7-րդ տարելիցի կապակցութեամբ: «Արմենպրես»-ը ներկայացնում է Արցախի ՀԱԳՆ-ի տարածած յայտարարութիւնը․
«2016 թ․ ապրիլի 1-ի լոյս 2-ի գիշերը, կոպտօրէն խախտելով 1994 թ. Կրակի եւ ռազմական գործողութիւնների ամբողջական դադարեցման մասին համաձայնագիրը, Ադրբեջանի զինուած ուժերը լայնածաւալ յարձակման անցան Արցախի Հանրապետութեան դէմ՝ օգտագործելով իրենց ողջ յարձակողական զինանոցը, այդ թւում՝ ծանր զրահատեխնիկայ, հրետանի եւ ռազմական օդուժ: Ադրբեջանական զինուժը ոչ միայն գրոհեց ԱՀ Պաշտպանութեան բանակի առաջապահ դիրքերը, այլեւ թիրախաւորեց սահմանամերձ բնակավայրերը՝ պատճառելով աւերածութիւններ, սպանելով եւ ծանր վիրաւորելով անմեղ քաղաքացիական անձանց, այդ թւում՝ կանանց եւ երեխաների: Ապրիլեան պատերազմի ընթացքում Ադրբեջանի զինուած ուժերը կատարեցին նաեւ բազմաթիւ վայրագութիւններ եւ պատերազմական յանցագործութիւններ, մասնաւորապէս՝ հայ ռազմագերիների եւ խաղաղ բնակիչների դաժան սպանութիւններ, գլխատումներ եւ սպանուածների մարմինների խոշտանգումներ։ Այդ դաժան յանցագործութիւններն իրականացնողները յետագայում Ադրբեջանի բարձրագոյն ղեկավարութեան ողմից արժանացան պետական խրախուսման, իսկ նրանց յանցագործութիւնները փառաբանուեցին ադրբեջանական հասարակութեան մէջ եւ ներկայացուեցին որպէս օրինակելի վարքագիծ:
Ապրիլեան ագրեսիան հերթական անգամ բացայայտեց խաղաղ գործընթացը տապալելու եւ հակամարտութիւնն ուժային ճանապարհով լուծելու Ադրբեջանի հեռահար նպատակները։ Աւելին, Ադրբեջանի յանցաւոր գործողութիւնների անպատժելիութիւնը եւ ստանձնած պարտաւորութիւնները չկատարելու հանդէպ միջազգային հանրութեան հանդուրժողականութիւնը, ըստ էութեան, պարարտ հող նախապատրաստեցին եւ հնարաւորութիւն ստեղծեցին Արցախի դէմ Ադրբեջանի նոր սադրանքների եւ ագրեսիայի համար։
Արդիւնքում, ընդամէնը չորս տարի անց՝ 2020 թուականի սեպտեմբերի 27-ին, Ադրբեջանը, Թուրքիայի ակտիւ աջակցութեամբ եւ միջազգային ահաբեկչական խմբաւորումների ներգրաւմամբ, նոր լայնածաւալ պատերազմ սանձազերծեց Արցախի դէմ՝ օկուպացնելով եւ էթնիկ զտման ենթարկելով Արցախի Հանրապետութեան տարածքի զգալի մասը։ Այսօր էլ, լիակատար անպատժելիութեան եւ անտարբերութեան մթնոլորտում, Ադրբեջանը շարունակում է իր ագրեսիւ եւ ահաբեկչական քաղաքականութիւնը Արցախի ժողովրդի նկատմամբ՝ շուրջ 4 ամիս Արցախի 120.000 բնակչութեանը պահելով անօրինական շրջափակման մէջ, պարբերաբար խախտելով 2020 թ. նոյեմբերի 9-ին Ռուսաստանի Դաշնութեան միջնորդութեամբ հաստատուած հրադադարի ռեժիմը՝ թիրախաւորելով ինչպէս ԱՀ ՊԲ զինծառայողներին, այնպէս էլ խաղաղ բնակչութեանը, գրաւելով նոր տարածքներ եւ ռազմավարական բարձունքներ, խաթարելով Արցախի ժողովրդի տարրական կենցաղային պայմաններն ապահովող ենթակառուցուածքների աշխատանքը։
Արցախի ժողովրդի դէմ շարունակուող Ադրբեջանի անօրինական գործողութիւնները ցոյց են տալիս, որ այդ երկրի իշխանութիւնները մտադիր չէն կատարել իրենց միջազգային պարտաւորութիւնները եւ վարում են Արցախի հայաթափման եւ օկուպացման հետեւողական քաղաքականութիւն։
Եւս մէկ անգամ կոչ ենք անում միջազգային հանրութեանը, եւ առաջին հերթին՝ ՄԱԿ-ի Անվտանգութեան խորհրդին, անյապաղ եւ արդիւնաւետ քայլեր ձեռնարկել Ադրբեջանի կողմից Արցախի ժողովրդի նկատմամբ իրականացուող էթնիկ զտման եւ ցեղասպան քաղաքականութիւնը կանխելու եւ, նախքան հակամարտութեան համապարփակ կարգաւորման հասնելը, Արցախում բնականոն կենսագործունէութեան ապահովման մեխանիզմներ եւ երաշխիքներ ներդնելու ուղղութեամբ։ Այս համատեքստում կարեւորում ենք Արցախի ժողովրդի կողմից իրացուած ինքնորոշման իրաւունքի միջազգային ճանաչումը, ինչն անհրաժեշտ նախադրեալ է նրա իրաւունքների, անվտանգութեան եւ խաղաղ զարգացման ապահովման համար»:
