Սահմանադրական դատարանը յունուարի 24-ի աշխատակարգային նիստում քննել է ԱԺ նախկին պատգամաւոր, «Հանուն հանրապետութեան» կուսակցութեան նախագահ Արման Բաբաջանեանի դիմումը եւ որոշել կարճել այն։ Սա նշանակում է, որ Բաբաջանեանը պարտաւոր է կատարել դատարանի որոշումը՝ ներողութիւն խնդրել ՀՅԴ-ից՝ հրապարակային վիրաւորանքների համար։ Դեռեւս 2019 թ․ դեկտեմբերին խորհրդարանում ունեցած ելոյթի ժամանակ նա ՀՅԴ-ին անուանել է «ահաբեկչական անցեալով յայտնի ուժ»: 2021 թ. յուլիսին առաջին ատեանի դատարանը պարտաւորեցրել էր Բաբաջանեանին՝ հրապարակաւ ներողութիւն խնդրել ՀՅԴ կուսակցութիւնից եւ Գերագոյն մարմնի բոլոր անդամներից՝ զրպարտելու համար։ Դա կատարել ֆեյսբուքեան էջով կամ մամուլի ասուլիսում՝ առնուազն 4 հեռուստաընկերութեան մասնակցութեամբ, ասելով․
«Յարգելի հետեւորդներ, 06.12.2019թ. ՀՀ ԱԺ ամբիոնից Հայ յեղափոխական դաշնակցութիւն կուսակցութեան վերաբերեալ ունեցած ելոյթումս տեղ գտած վիրաւորական արտայայտութիւնների համար ներողութիւն եմ խնդրում ՀՅԴ-ից, ինչպէս նաեւ կուսակցութեան ԳՄ բոլոր անդամներից»։
Տեսանիւթը պէտք է պահպանուի ՖԲ էջում, որպէս փոխհատուցում՝ բռնագանձւում է սիմուոլիկ 1 դրամ: Բաբաջանեանը հրաժարուել էր ներողութիւն խնդրել` փորձելով վիճարկել յաջորդ ատեաններում, ապարդիւն։ Ապա դիմել էր ՍԴ:
Նշէնք, որ անցած տարի հարկադիր կատարումն ապահովող ծառայութիւնը, հիմք ընդունելով Երեւանի դատարանի 15.09.2022 թ. որոշումը, պարտաւորեցրել է Բաբաջանեանին՝ կատարել դատարանի որոշումը:
hraparak.am
