Տիրայր Մուրադեան
Վարչական դատարանում սկսուեց Երեւանի կենտրոնում գտնուող «Սիլ պլազայ» շէնքի՝ 1995-97 թուականներին տեղի ունեցած սեփականաշնորհման օրինականութիւնը վիճարկելու գործով դատական քննութիւնը։
Ազգային ժողովի «Քաղաքացիական պայմանագիր» խմբակցութեան անդամ Խաչատուր Սուքիասեանի ընտանիքին պատկանող շէնքը Գլխաւոր դատախազութիւնը ցանկանում է վերադարձնել պետութեանը։
Այս գործով հայցուորը Գլխաւոր դատախազութիւնն է, պատասխանողը՝ Կադաստրի կոմիտէն, իսկ «Սիլ պլազայի» սեփականատէր «Գռզոյ պլազայ» ՍՊԸ-ն դատարանում հանդէս է գալիս որպէս երրորդ անձ։
Դատական նիստին «Գռզոյ պլազայ» ՍՊԸ-ի ներկայացուցիչ, փաստաբան Գորիկ Միրզոյեանը դատաւոր Անի Յարութիւնեանին բացարկ յայտնելու միջնորդութիւն ներկայացրեց։ Փաստաբանը յիշեցրեց, որ Գլխաւոր դատախազութիւնը 2022 թ.-ին յայտարարել էր դատաւոր Անի Յարութիւնեանի վերաբերեալ հանրային քրէական հետապնդում յարուցելու մասին։
«Անկողմնակալ դիտորդի մօտ կարող է կասկած յարուցել դատական ակտի օբյեկտիւ լինելը։ Դատաւորը կարող է ունենալ որոշակի կաշկանդուածութիւն նշուած քրէական գործի առկայութեան պայմաններում։ Հակառակ դէպքում, եթէ նոյնիսկ դատական ակտով հայցը մերժուի, նոյնպէս կարող է նման տրամաբանութեամբ, կրկին անկողմնակալ դիտորդի մօտ այդ տպաւորութիւնը ստեղծուել։ Հետեւաբար, կարծում եմ, որ սա հիմք է, որ դատաւորը ինքնաբացարկ յայտնի սոյն գործով»,- յայտարարեց «Գռզոյ պլազայ» ՍՊԸ-ի ներկայացուցիչ Գորիկ Միրզոյեանը։
Հայցուոր կողմի ներկայացուցիչ, Գլխաւոր դատախազութեան պետական շահերի պաշտպանութեան վարչութեան դատախազ Սոնայ Յովսեփեանն առարկեց դատաւորին բացարկ յայտնելու միջնորդութեան դէմ։ Դատախազը նշեց, որ դատախազութեան կողմից դատաւորի նկատմամբ հանրային քրէական հետապնդում յարուցելու հանգամանքը չի կարող անկողմնակալութիւն ի յայտ բերել։
Դատաւոր Անի Յարութիւնեանն իր դէմ ներկայացուած բացարկի հարցով որոշում կայացնելու նպատակով նիստը յետաձգեց։
Գլխաւոր դատախազութիւնը դատաւորի նկատմամբ քրէական հետապնդում է յարուցել 2 դրուագով (յանցաւոր ճանապարհով ստացուած, առանձնապէս խոշոր չափերով գոյքի օրինականացմանն օժանդակելը եւ յայտարարագրում կեղծ տուեալ ներկայացնելը)։ Դատաւոր Յարութիւնեանը ԱԱԾ տնօրենի նախկին տեղակալ Գրիգորի (Գրիշայ) Յարութիւնեանի դուստրն է, վարչական դատարանի դատաւոր է նշանակուել 2013 թ.-ին։
Գլխաւոր դատախազութիւնը դատարանից պահանջում է «Երքաղխորհրդի գործկոմի եւ «Աստղիկ-1» կոոպերատիւի միջեւ Երեւան քաղաքի Արամի փողոց 3 եւ 5 հասցէների անշարժ գոյքի օտարման իրաւայարաբերութեան բացակայութիւնը ճանաչել եւ որպէս հետեւանք իրաւունքի պետական գրանցումները անուաւեր ճանաչել»։
Իրաւական այս գործընթացը տեղի ունեցաւ «Հետք»-ի՝ «$ 5655․ սեփականաշնորհում՝ «ջրի գնով»» վերտառութեամբ հետաքննութեան հրապարակումից յետոյ։ Գլխաւոր դատախազութիւնում մեր յօդուածն ուսումնասիրուեց, ապա քրէական գործ յարուցուեց, որից յետոյ դատախազութիւնը դիմեց դատարան։
