Այսօր ՀՅԴ Բիւրոյի Երիտասարդական գրասենեակը ՀՅԴ «Սիմոն Վրացեան» կենտրոնում հանդէս է եկել մամուլի ասուլիսով, ամփոփել փետրուարի 6-10-ը կայացած ՀՅԴ Երիտասարդական համագումարի արդիւնքները։
ՀՅԴ երիտասարդականը յանձնառու է արմատախիլ անել յարմարուողականութիւնն ու պարտողականութիւնը մեր երիտասարդութեան շրջանակներում. յայտարարեց ՀՅԴ Բիւրոյի Երիտասարդական գրասենեակի ներկայացուցիչ Ցողիկ Աշըգեանը:
«Խաբկանք է այն կարծիքը, որ առանց Արցախի հնարաւոր է խաղաղ ապրել Հայաստանում: ՀՅԴ երիտասարդականը շարունակում է պայքարը բոլոր ապազգային իշխանութիւնների դէմ, եւ խանգարելու է իրենց քաղաքականութիւնները, արգելք է հանդիսանում Հայաստանի թրքացման իրենց ծրագրերի առջեւ»,-ասաց նա:
Ցողիկ Աշըգեանի խօսքով, Արցախի հարցը Հայ դատի կարեւոր հանգրուաններից մէկն է. «Եթէ այսօր Արցախին չտրուեց այն, ինչ նա պահանջում է՝ արդարութիւն եւ իր իրաւունքները ուպէս հանրապետութիւն, մենք չունենք հնարաւորութիւն շարունակելու Հայ դատի պայքարը, որովհետեւ մի օղակը միւսին լրացնում է»:
Մենք ամիսներ առաջ էինք նախատեսել այս համագումարի կազմակերպումը, բաւականին աշխատել ենք ծրագրի մշակման մէջ։ Շատ զգոյշ էինք, որ հայրենիքի այս դժուար ժամանակներում ինչքան հնարաւոր է մեր գաղափարակից ընկերներին ներգրաւեինք այն աշխատանքներին, որոնք տեղի ունեցան. ասուլիսի ժամանակ ասաց Սիրիայի ՀՅԴ բիւրոյի երիտասարդական խորհրդի անդամ, պատանեկան յանձնախմբի պատասխանատու Մարիայ Գաբրիելեանը։
«Կարեւոր նախագծեր մշակեցինք, ռազմավարութիւն ճշտեցինք ներքին կազմակերպչական, երիտասարդականին, ուսանողականին, պատանեկանին առնչուած ուղեցոյցների հայեցակարգի մշակումներ իրականացրեցինք, ինչպէս նաեւ հայրենիքին առնչուած նախագծեր ստեղծեցինք։ Բաւական լուրջ էր համագումարի մասնակիցների մօտեցումը, ինչպէս նաեւ կազմակերպչական աշխատանքը։ Մտավախութիւն չունէինք մօտեցումների կամ վերաբերմունքի համար, բայց հաստատեցինք այս մի քանի օրուայ համագումարի ժամանակ, որ ինչ աշխատանք տարել ենք տարիներն ի վեր նոյն ուղղութիւնը բռնել ենք, թէ՛ Սփիւռքի մէջ, թէ՛ հայրենիքի։ Մտավախութիւն չունենք ազգասէր եւ հայրենասէր սերունդներ չունենալու առնչութեամբ։ Այդ ուղղութեամբ տարիների աշխատանքը իզուր չէ։ Հայրենիքի այս դժուար օրերին՝ պատրաստակամութիւնը գալ օգտակար դառնալու համար շատ ոգեւորիչ էր։ Այլեւս այդ միտքը, որ անտարբերութիւն է երիտասարդութեան մօտ ընդհանրապէս դուրս եկաւ մեր մտքից»,- ասաց նա։
Նրա խօսքով՝ իրենք բոլորը միանման էին մտածում հանուն հայրենիքի բարօրութեան, հանուն իրենց հետապնդած նպատակների իրականացման։
Ինչպէս գիտեք ՀՅԴ-ի համաշխարհային երիտասարդական ամբողջ կառոյցը հայ իրականութեան մէջ եզակիներից է, քանի որ, պէտք է նաեւ ասեմ ցաւալիօրէն, նման ազգայի կառոյցները եւ ազգային միաւորները շատ աւելի քիչ են այս պահին, Դաշնակցութիւնը եզակի է իր համաշխարհային երիտասարդական կուռ կառոյցով. ասաց ՀՅԴ Հայաստանի երիտասարդական միութեան անդամ, Սիւնիքում ՀՅԴ երիտասարդական գործիչ Գոռ Մաթեւոսեանը։
«Հնրավարութիւն ունեցայ ՀՅԴ Բիւրոյի Երիտասարդական գրասենեակի նախաձեռնութեամբ իրականցել համագումար երիտասարդութեան հարցերով, ներմիութենական, Արցախի հիմնախնդիրների նաեւ մտահոգութիւնների վերհանման ամբողջական երիտասարդական միութիւնների հնարաւորութիւնները չափելով, թէ որքանով ենք մենք կարողանում մեր հնարաւորութիւնները ներդնել Արցախի եւ Սիւնիքի մէջ։ Բոլորիս համար գաղտնիք չէ, որ եւ՛ Արցախը, եւ՛ Սիւնքը վտանգուած են եւ շատ կարեւոր համարուեց, որ այս համագումարն անցկացուի Սիւնիքում։ Կրկին անգամ վերանորոգեցինք մեր գաղափարը, որ մեր ամբողջ կառոյցը՝ իր բոլոր կարողականութիւնները ներդնելու է Սիւնիքի եւ Արցախի մէջ»,- ասաց նա։
Նրա խօսքով՝ բոլորի համար գաղտնիք չէ, որ վերջին շրջանում ՀՅԴ երիտասարդութիւնը պայքարի առաջնագծում է եղել, բոլոր այն պայքարների, որոնք եղել են ազգայինի դէմ, Արցախի դէմ, մեր շահերի դէմ եւ ինչպէս գիտենք նաեւ ՀՅԴ ամբողջական կառոյցը նոյն կերպ Սփիւռքում իր բոլոր ջանքերն է ներդրել այդ ապազգային երեւոյթների դէմ պայքարելու համար:
Ըստ ՀՅԴ Ամերիկայի Արեւմտեան շրջանի Երիտասարդական Միութեան կենտրոնական վարչութեան անդամ Ալեքս Մանուկեանի՝ այս համագումարը շատ կարեւոր եւ ոգեւորիչ ժողով էր մեր կառոյցներում եւ ընդհանրապէս հայ երիտասարդութեան համար։ Սփիւռքի համար Արցախը եւ մեր հայրենական հողերի վերականգնման հարցերը միշտ եղել են եւ պէտք է մնան առաջնահերթութիւն;
«Միշտ Սփիւռքը պէտք է վառ պահի արժանապատիւ ազգային օրակարգները մեր շրջանների մէջ եւ ինձ համար շատ տպաւորիչ էր տեսնել, որ մեր Սփիւռքի երիտասարդ ղեկավարները նոյն օրակարգով էին շարժւում եւ հայրենիքի երիտասարդները նոյնպէս։ ՀՅԴ-ն Գարեգին Նժդեհի շնչով պէտք է շարունակի իր պայքարը եւ յաղթահարի այս շատ դժուարին օրրեը, որի միջով անցնում է հայ ազգն ու հայրենիքը։ Ինչպէս ասեցի Սփիւռքը միշտ Արցախի եւ ազգային արժանապատիւ օրակարգերի թիկունքում կը կանգի։ Մենք մինչեւ այսօր կը շարունակէնք եւ պէտք է շարունակէնք այս պայքարը հանուն Արցախի, հանուն Սիւնիքի եւ հանուն ամբողջական Հայաստանի եւ ոչ մի բան չպէտք է մէզ շեղի այս օրակարգից»,- ասաց նա։
Ասուլիսի մանրամասները՝ տեսանիւթում
