Այսօր ՀՅԴ Բիւրոյի ներկայացուցիչ Յակոբ Տեր- Խաչատուրեանի գլխաւորութեամբ, ՀՅԴ Բիւրոյի, Հայաստանի Գերագոյն մարմնի եւ ԱԺ «Հայաստան» խմբակցութեան պատգամաւորների միացեալ պատուիրակութիւնն այցելել է Հայաստանի Հանրապետութիւնում Սիրիայի Արաբական Հանրապետութեան դեսպանատուն։
Դեսպան դոկտոր Նորայ Արիսեանին ՀՅ Դաշնակցութեան համահայկական ընտանիքի անունից Յակոբ Տեր- Խաչատուրեանը փոխանցել է Սիրիայի ղեկավարութեանն ու ժողովրդին ուղղուած ցաւակցութիւններն ու զօրակցութիւնը։ Նա յոյս է յայտնել, որ տասնամեայ ահաբեկչական պատերազմից վէրքերը բուժող Սիրիան եւ նրա ժողովուրդը կը յաղթահարի նաեւ այս աղէտը եւ կուղղի իր մէջքը։
ՀՅԴ Բիւրոյի ներկայացուցիչը նշել է, որ աղէտից հաշուած ժամէր անց զօրաշարժի են ենթարկուել ողջ աշխարհի դաշնակցական կառոյցներն ու ուղեկից միութիւնները՝ Սիրիայի ժողովրդին եւ Սիրիայում բնակուող մեր հայրենակիցներին հնարաւորինս լայն օժանդակութիւն ապահովելու համար։
Տիկին դեսպանը շնորհակալութիւն է յայտնել ՀՅԴ լայն աջակցութեան եւ ցաւակցութիւնների համար։ Նա իր երկրի անունից յատուկ գնահատել է անցնող տարիներին Դաշնակցութեան կողմից իրականացուած մարդասիրական օգնութիւնը եւ աջակցութիւնը։ Դեսպանը կարեւորել է հայ փրկարարների ներկայութիւնն աղէտի գոտում, նշելով, որ միջազգային սահմանափակումների պատճառով երկրում այդ հարցում կար բաւականին մեծ բաց, որը կարող են լրացնել նաեւ հայ փորձառու փրկարարները։ Դեսպանը յատուկ յուզմունքով նշել է, որ աղէտի առաջին ժամէրից սկսեալ բազում երեւանցիներ շտապել են դեսպանատան մօտ, անգամ որեւէ կապ չունենալով Սիրիայի հետ, իրենց վշտակցութիւնն են արտայայտել ու ծաղիկներ խոնարհել դեսպանատան դիմաց։
Յակոբ Տեր- Խաչատուրեանը նաեւ տեղեկացրել է, որ Դաշնակցութեան կառոյցները տարբեր երկրներում ջանքեր են գործադրում Սիրիայի Արաբական Հանրապետութեան նկատմամբ միջազգային շրջափակման վերացման եւ այդ երկիր մարդաստիրական օգնութեան առաքման ուղղութեամբ։
Հանդիպման աւարտին ՀՅԴ Բիւրոյի ներկայացուցիչը ՀՅԴ անունից գրառում է կատարել սգոյ մատեանում։ ՀՀ ԱԺ Հայաստան-Սիրիայ պատգամաւորական բարեկամութեան խմբի անունից սգոյ մատեանում գրառում է կատարել նաեւ այդ խմբի անդամ, «Հայաստան» խմբակցութեան պատգամաւոր Գեղամ Մանուկեանը։
