ԱԺ «Պատիւ ունեմ» խմբակցութեան քարտուղար Տիգրան Աբրահամեանը գրում է.
«Եթէ Ադրբեջանը հասել է նրան, որ ԵՄ դիտորդական առաքելութիւնը Հայաստանում տեղակայւում է զուտ ՀՀ-ՌԴ հնարաւոր «ագրեսիան» կանխելու համար` Փաշինեանն է պնդում, ապա սա նշանակում է, որ Ադրբեջանին յաջողուել է արտաքին աշխարհին համոզել, որ ՀՀ-ի դէմ իր յարձակումները «պաշտպանուելու» նպատակ են ունեցել:
Ըստ Փաշինեանի` Ադրբեջանը պատերազմից յետոյ ՀՀ ինքնիշխան տարածքի բռնազաւթումը, նոր բնագծեր, բարձունքներ վերցնելը դրանով է հիմնաւորել ու փաստօրէն ստացուել է:
Ի՞նչ մակարդակի անտէրութիւն ու փլուզում պէտք է լինի երկրի կառավարման համակարգում, որ Արցախի ուղղութեամբ լայնամասշտաբ պատերազմ ձեռնարկէն, այնուհետեւ 5 յարձակում Հայաստանի ու Արցախի նկատմամբ, յետոյ ՀՀ-ն ու Արցախն իրար կապող միակ ճանապարհը փակէն, տարածքային հսկայական զիջումներ, կորուստներ տաս, հազարաւոր մարդիկ զոհուէն, իսկ դու արտաքին աշխարհին դեռ փորձում ես համոզել, որ ագրեսոր չես, պատերազմի նախաձեռնող չես, պատերազմ չես ուզում:
Ու այս համատեքստում` իբր «ագրեսորի» կամ «ռեւանշիստի» տպաւորութիւն չթողնելու համար զօրավարժութիւններ չես ձեռնարկում, բանակիդ մարտունակութեան բարձրացմանն ուղղուած ինտենսիւ միջոցառումներ չես ձեռնարկում, դաշնակցիդ ռազմաբազան սպառնալիք ես յայտարարում ու հանգիստ սպասում, թէ երբ թշնամիներդ հերթական արշաւը կը սկսէն քո երկրի նկատմամբ:
Ի՞նչ է սա, եթէ ոչ փաշինեանական հաշուարկուած եւ պլանաւորուած պարտութեան նոր ծրագիր:
Աղբիւր` Panorama.am
