Տարիներու սովորութիւն դարձած է Հ.Յ.Դ. Յունաստանի Պատասխանատու մարմինին կողմէ հրաւիրել միութենական կառոյցները ամանորեայ գաթայի կտրումի հաւաքին։ Սոսկ հաւաքոյթ մը չէ, ուր նոր տարուան բարեմաղթանքներու փոխանակում տեղի կ՚ունենայ, այլ նաեւ՝ առիթ մը տօնական մթնոլորտի մէջ արժեւորելու անցնող տարին ու նոր թափով սկսելու գաղութային գործունէութեան ուղին։
Այս տարին եւս, աւելի քան 30 անդամներու ներկայութեան, միութենական հաւաքը առիթ մը եղաւ համատեղ խմբուելու եւ վերանորոգ տրամադրութեամբ արժեւորելու գաղութային կազմակերպ իրականութիւնը ու հայ հաւաքականութինը աշխուժ պահելու պատրաստակամութիւնը։
Բացի հաւաքը կազմակերպող Հ.Յ.Դ. Կեդր. կոմիտէի կազմէն, ներկայ եղան շրջաններու «Ա. Մանուկեան», «Մ. Վարանդեան» եւ «Գ. Լազեան» կոմիտէներու անդամները, Հայ դատի յանձնախումբը, Հ.Յ.Դ. Երիտ. Միութեան Կեդր. վարչութիւնը եւ Պատանեկան Միութեան Ընդհ. վարիչ մարմինը, «Ազատ Օր»-ի աշխատակազմը, ինչպէս նաեւ Հ.Կ.Խաչի, Հ.Մ.Ը.Մ.-ի եւ Համազգայինի Շրջ. վարչութիւններու ներկայացուցիչները, Հ.Կ.Խաչի ազգային վարժարաններու տնօրէնները, առաւել՝ անցեալին Կ.Կ.-ի մէջ պաշտօն ունեցած նախկին ներկայացուցիչները։
Հ.Յ.Դ. Յունաստանի Կեդրոնական կոմիտէի անունով բացումը կատարեց ընկ. Հռիփսիմէ Յարութիւնեան, որ նախապէս ջերմ մաղթանքներ տուաւ նոր տարուան առիթով։ Մասնաւորապէս, ընկերուհին անդրադարձաւ անցնող նստաշրջանին ընթացքին առաջադրուած թիրախներուն, որ կը կայանային երիտասարդացում եւ աշխուժացում գաղափարներուն շուրջ։ Գաղութային մեր յարակից միութիւններու եւ վարչութիւններուն մէջ յաւելեալ թիւով հայրենակիցներ համախմբելու եւ անոնք գործունեայ, աշխուժ ու կազմակերպ պահելու կարեւոր առաջադրանքը՝ ուղղակիօրէն կապակցուած է մեր գործունէութեան ընդլայնման հետ։ Ուժեղ եւ կուռ կառոյցին ընդմէջէն է, որ կարելի կ՚ըլլայ մեր ամբողջ ներուժը օգտագործել, ի սպաս ազգային մեր առաջնահերթ օրակարգերուն՝ Հայ դատի աշխատանքներուն, հայրենիքի հզօրացման ու անվտանգութեան ամրապնդման գործին մէջ։
Այսօր, դէմ յանդիման կը գտնուինք մեր ազգին համար ծանրագոյն օրերու հոլովոյթին։ Արցախի բնակչութեան աւելի քան 20 տոկոսը դարձած է փախստական, իսկ 120.000 մարդ կ՚ապրի ծայրայեղ ծանր պայմաններու մէջ, զրկուած մարդկային իրաւունքներու ամէնէն տարրական միջոցներէն, շրջապատուած իր հայրենիքին մէջ՝ բայց ոչ առանձնացած։ Այս լրջագոյն մարտահրաւէրը մեզ բոլորիս պէտք է յաւելեալ զգօն պահէ, որպէսզի յաղթահարենք մեծագոյն վտանգները որ կրնան բացուիլ մեր ազգին առջեւ։ Ընկերուհին ընդգծեց նաեւ, թէ գաղութի մարմիններուն կողմէ նախաձեռնուած քաղաքական ու պահանջատիրական քայլերու կողքին, անհրաժեշտ է ժողովուրդին մէջ բարձր պահել Արցախին զօրավիգ կանգնելու պատրաստակամութեան ոգին, որպէսզի մեր ձայնը լսելի դառնայ միջազգային ընտանիքէն ներս։
Յաջորդաբար, հրաւիրուեցաւ ընկ. Գեղամ Եաղճեան, որպէսզի կատարէ ամանորեայ գաթայի բաշխումը։ Ընկերը խօսք առնելով, ինք եւս շնորհաւորեց ամանորը եւ շեշտեց գաղութային կեանքը շարժումի մէջ պահելու անհրաժեշտութիւնը։ Ան անդրադարձ ընելով Արցախի ներկայ իրավիճակին ու հայութեան շրջափակման, նշեց բոլոր գործօններու մասնակցութիւնը Արցախի հիմնահարցի զօրակցութեան խնդիրին մէջ։ Նաեւ նշում ընելով անցեալ տարի Փոքր Ասիոյ աղէտի 100-ամեակին, յայտնեց, թէ այսօրուան գաղութը իր գոյութիւնը կը պարտի իրենց հողերէն արմատախիլ դարձած մեր հայրերուն, որոնք ամէնէն թշուառ պայմաններուն տակ գաղութ կազմակերպեցին ու ամէն գնով ոտքի պահեցին, ի խնդիր հայութեան գոյատեւման։ Նոյն նախանձախնդրութեամբ պարտին քալել ներկայ սերունդները եւս, շեշտեց ընկերը։
Յաջորդեց հիւրասիրութիւն եւ մտերմիկ զրոյց գաղութային շրջագիծի օրակարգերուն եւ մտահոգութիւններուն շուրջ։ Նաեւ, կարկանդակի բախտաւոր անձը նուէր ստացաւ Նիկոլ Դումանի եւ Քրիստափորի նամականիներու արժէքաւոր հրատարակութիւնները եւ այլ նուէրներ։
azator.gr
