Ֆրանսիայի «ՀՅԴ Նոր Սերունդ» երիտասարդական միութեան Կենտրոնական վարչութեան ատենապետ Նժդեհ Գարագաւորեանը հակաժողովրդավարական է համարում իր՝ Հայաստանի համար անցանկալի անձ ճանաչուելու որոշումը, որի մասին օրեր առաջ տեղեկացել է Հայաստանի Ազգային անվտանգութեան ծառայութիւնից։
«Այս որոշումը արհեսատական բնոյթ է կրում, ապացուցում է Կառաւարութեան ապազգային լինելը։ Նրանք նպատակ են հետապնդում քանդել Հայաստան–Արցախ–Սփիւռք եռամիասնութիւնը։ ԱԱԾ–ի նամակի մէջ չկայ որեւէ փաստարկ, թէ ինչու եմ ես համարւում անցանկալի անձ, պատճառաբանում են գաղտնիութիւնը։ Հայաստանում եւ Արցախում ինձ ճանաչողները շատ լաւ գիտէն, որ ես կապ չունեմ որեւէ հակօրինական գործի հետ։ Իմ գործունէութիւնը մեծապէս եղել է մարդասիրական բնոյթի։ Կասկած չունեմ, որ այս որոշումը քաղաքական է, մտահոգութիւն կայ՝ սա միայն ներքաղաքական որոշմա՞ն հետեւանք է, թե՞ նաեւ արտաքին միջամտութիւն կայ։ Սփիւռքում ՀՅԴ երիտասարդ միութիւնները թիրախաւորում են ադրբեջանական, թուրքական դեսպանատները, կամ էլ ադրբեջանամէտ, թուրքամէտ գործիչներին»,– NEWS.am–ի հետ զրոյցում ասաց Նժդեհ Գարագաւորեանը։
Նժդեհը Հայաստան պէտք է գար, որ փետրուարի 6-10 Սիւնիքի մարզում մասնակցեր ՀՅԴ Երիտասարդական համաշխարհային համագումարին։ Նրա խօսքով՝ աւելի քան 25 երկրից ներկայացուցիչներ են ժամանելու Հայաստան։ Ֆրանսիայից ՀՅԴ–ական միւս ներկայացուցիչները կը լինէն միջոցառմանը։
«Այդ համագումարին պէտք է քննարկուեր եւ իմ բացակայութեան ժամանակ էլ պէտք է քննարկուի Արցախի պաշարման վերաբերեալ մեր անելիքները, պէտք է համադրել Սփիւռքի կարողութիւնները եւ ճնշում գործադրել Ադրբեջանի վրայ։ Մենք չենք կիսում Նիկոլ Փաշինեանի զիջողական, պարտուողական մօտեցումը։ Նրա առաջարկած «խաղաղութեան» օրակարգը կեղծ է, այն մեծ աղէտ է մեր ժողովրդի համար, միգուցէ նաեւ կորուստներ պատճառի։ Նիկոլ Փաշինեանն իր անպատասխանատու քաղաքականութեամբ մէզ յանգեցրել է այս իրավիճակին, մենք շատ բան ենք կորցրել, ինչը վերականգնելու համար պէտք է պայքարէնք, վստահ ենք, որ մենք շիտակ ճանապարհի վրայ ենք։ Ազգային–ազատագրական պայքար լինելու է, մեր կարմիր գծերը չէն հատուելու, Արցախը երբեք չի լինելու Ադրբեջանի կազմի մէջ»,–ընդգծեց Նժդեհ Գարագաւորեանը։
