Այսօրուանից համացանցի վրայ ընթերցողը կարող է գտնել «Դրօշակի» 2023 թուականի առաջին համարը։ Լինելով օրուայ հրատապ խնդիրների հետ «Դրօշակի» ներկայ համարի նիւթերի հիմնական թեման առնչւում է Հայաստանի ու Արցախի դիմագրաւած փորձութիւններին եւ, մասնաւորապէս, Արցախի շրջափակման թեմային։ Համարի առաջնորդողում անդրադարձ է կատարւում արտաքին ազդեցութիւնների ներքոյ Հայաստանի իշխանութիւնների վարած անհեռանկար ու վտանգաւոր քաղաքականութեանը՝ մասնաւորապէս իր դաշնակիցների նկատմամբ՝ եւ նոյնքան վտագաւոր սիրաբանութեանը Հայաստան-Արցախը խեղդել փորձող թշնամիների հետ։
Քաղաքագէտ Հրանտ Մելիք-Շահնազարեանը «Ռուսաստանի տարածաշրջանային շահերը։ Ինչպե՞ս յարաբերուել Մոսկուայի հետ» խորագրի ներքոյ քննական հայեացքով վերլուծում է Հայաստանի իշխանութիւնների որդեգրած քաղաքականութիւնը Ռուսաստանի նկատմամբ, ինչպէս եւ Ռուսաստանի տարածաշրջանային ներկայ քաղաքականութիւնը։
Իրանագէտներ Նարէ Գեւորգեանը եւ Ժաննայ Վարդանեանը անդրադառնում են Հայաստանի եւնրայ շուրջ տեղի ունեցող իրադարձութիւնների հանդէպ հարեւան ու դաշնակից Իրանի վերաբերմունքին, ինչն իր արտացոլումն է գտնում, մասնաւորապէս փորձագիտական շրջանակների մեկնաբանութիւններում։ Իրանագէտ Լիանայ Պետրոսեանն իր հերթին լուսաբանում է Միացեալ թագաւորութեան հետաքրքրութիւնները տարածաշրջանային իրադարձութիւնների նկատմամբ, ինչը պայմանաւորուած է, մասնաւորապէս, տնտեսական այն գործարքներով, որոնք գոյութիւն ունեն այս երկրի եւ Ադրբեջանի միջեւ։ ՀՀ ԳԱԱ արեւելագիտութեան ինստիտուտի միջազգային յարաբերութիւնների բաժնի վարիչ Արաքս Փաշայանը անդրադառնում է հայ-հնդկական դարաւոր կապերին եւ արժեւորում է համաշխարհային քաղաքական մեծ կշիռ ունեցող բարեկամ երկրի հետ Հայաստանի արդիւնաւետ ու հեռանկարային կապերը աշխուժացնելու կարեւորութեանը։
Ազգային անվտանգութեան խնդիրների մասնագէտ Արփի Աբրահամեանը անդրադառնում է Հայաստան-Եւրոմիութիւն յարաբերութիւնների զարգացմանը, ինչպէս եւ եւրոմիութեան ոչ համարժէք արձագանքին Ադրբեջանի շեշտուած հակահայ գործողութիւններին։
2003 թուականի մեկնարկային համարում «Դրօշակը» ներկայացնում է այլ հետաքրքրական հրապարակումներ եւս:
