Ֆրանսիայի հայկական կազմակերպութիւնները համակարգող խորհրդի համանախագահ, ՀՅԴ Բիւրոյի անդամ Մուրադ Փափազեանը հայց է ներկայացրել ՀՀ վարչական դատարան՝ ընդդէմ Ազգային անվտանգութեան ծառայութեանը՝ պահանջով, որ դատարանը պարտաւորեցնի ԱԱԾ-ին ՀՀ տարածքում անցանկալի համարուող օտարերկրացիների տուեալների բանկից Փափազեանի տուեալները հանէն։
Յիշեցնենք, որ Մուրադ Փափազեանը ընտանիքի հետ 2022թ յուլիսի 14-ին ժամանել էր ՀՀ, սակայն «Զուարթնոց» օդանաւակայանի սահմանային անցման կէտում իրաւասու աշխատակիցները չէին թոյլատրել վերջինիս մուտքը Հայաստան՝ միայն պատճառաբանելով, թէ ինքն ընդգրկուած է Հայաստանի համար անցանկալի անձանց ցուցակում։ Մուրադ Փափազեանը ստիպուած եղաւ նոյն օրն ընտանիքի հետ վերադառնալ Ֆրանսիայ։ Ընդ որում, Մուրադ Փափազեանի մուտքը մինչ այդ արգելուած էր Թուրքիայում եւ Ադրբեջանում։ Փափազեանի մուտքը Հայաստանը արգելելուց բաւականին երկար ժամանակ յետոյ միայն Հայաստանի իշխանութիւնները որոշեցին ինչ-որ ձեւով հիմնաւորել այդ քայլը։
Վարչապետի աշխատակազմի պարզաբանման համաձայն՝ պատճառը այն է եղել, որ Փափազեանը իբր կազմակերպել է Ֆրանսիայում Փաշինեանի աւտօշարասեան վրայ յարձակում․ «Տվեալ անձը հանդիսանում է նախորդ տարուայ յունիսի 1-ին Ֆրանսիայում ՀՀ դեսպանութեան մօտ վարչապետի գլխաւորած կառավարական պատուիրակութեան՝ ՀՀ պետական դրօշակիր աւտօշարասեան դէմ յարձակում կազմակերպած անձանցից մէկը: Աւտոշարասեան ուղղութեամբ նետուել են տարբեր իրեր, առարկաներ: Վարչապետի՝ ՀՀ պետական դրօշակիր աւտօմեքենան ենթարկուել է յարձակման, եւ ստեղծուած իրավիճակը յաղթահարուել է միայն ֆրանսիական ոստիկանութեան եւ անվտանգութեան ուժերի ջանքերի արդիւնքում: Այդ մասին վկաեօղ տուեալներ հրապարակուել են տարբեր լրատուամիջոցների կողմից, իսկ տեսանիւթերն առկայ են նաեւ համացանցում: Ոչ միայն Ձեր կողմից նշուած անձի, այլեւ յարձակման ակտիւ մասնակիցների մուտքը Հայաստանի Հանրապետութիւն արգելուել է: Ընդ որում, Հայաստանի Հանրապետութիւնը որեւէ վերապահում չունի խաղաղ ակցիաների որեւէ մասնակցի նկատմամբ: Իսկ յարձակումների կազմակերպիչների եւ մասնակիցների մուտքը Հայաստանի Հանրապետութիւն՝ օրէնքով սահմանուած կարգով արգելուել է»։
Փափազեանը, սակայն, հերքել էր այս յայտարարութիւնը՝ ասելով, որ ինքը այդ ցոյցը չի կազմակերպել եւ ներկայ էլ չի եղել դրան․
«Ամէն օր այս կառավարութիւնը սուտ կը խօսի ժողովուրդին ու հայութեան առաջ։ Ես պաշտօնապէս կը յայտարարիմ, որ կապ չունիմ, չեմ կազմակերպած այդ ցոյցը եւ ներկայ չէի այդ ցոյցին։ Եթէ իրենք փաստէր ունին, թող ներկայացնեն իրենց փաստերը, թող փաստերը հրամցնեն ժողովուրդին, բայց չունին, որովհետեւ ես ներկայ չէի այդ ցոյցին։ Ուրեմն չէն գիդեր, թէ ինչպէս մէջէն ելնէն, հաւանաբար վաղը-միւս օր մէկ այլ պատճառ մը պիտի ներկայացնեն, եւ այդպէս պիտի շարունակուի։ Իրենք պատրուակներ կփնտրէն, իրենց ասածները սուտ են ու սխալ են, եւ իրենք պարտաւոր են այսօր փաստերը ներկայացնել»,- ասել էր Փափազեանը։
Նշէնք, որ վարչական դատարանը վարոյթ է ընդունել Փափազեանի հայցը, նրա ներկայացուցիչներն են «Հայաստան» դաշինքի պատգամաւոր, դաշնակցական Արծուիկ Մինասեանն ու իրաւապաշտպան Սիրանուշ Սահակեանը, հայցը դատաւոր Հրաչ Այուազեանի վարոյթում է։
