Յարգելի՛ հայրենակիցներ,
Խորհրդարանական մէկամեայ գործունէութեան փորձը ցոյց է տուել, որ գործադիր իշխանութիւնը եւ իր կցորդ խորհրդարանական մեծամասնութիւնը, խախտելով Սահմանադրութիւնն ու օրէնքները՝ տապալում են Ազգային ժողովի բնականոն աշխատանքը:
Անվտանգութեան լրջագոյն սպառնալիքներն անտեսելով՝ գործող իշխանութիւնները Ազգային ժողովին պարտադրում են Հայաստանին եւ Արցախին պատուհասած անմիջական վտանգներին անհաղորդ օրակարգեր: Աւելին՝ ՔՊ-ի կողմից ԱԺ կանոնակարգի կոպտագոյն խախտումները, նիստէրի վարման միջազգային ստանդարտների անտեսումը, եւ մեծամասնութեան լիազօրութիւնների ակնյայտ չարաշահումները ապալեգիտիմացնում են խորհրդարանի՝ որպէս առաջնային մանդատ ունեցող ներկայացուցչական մարմնի գործունէութիւնը:
Այս պայմաններում՝ ապօրինութիւններով գործող խորհրդարանական մեծամասնութեան դէմ պայքարում շարունակելու ենք կիրառել միջազգային պրակտիկայում ընդունուած քաղաքական բոյկոտի գործիքը, այն է՝ չենք մասնակցելու ոչ առաջնային, յաճախ էլ արհեստական օրակարգերով լեցուն ԱԺ եւ նրա յանձնաժողովների նիստէրին։
Ինչպէս բազմիցս յայտարարել ենք, խորհրդարանական նիստէրին մեր մասնակցութիւնը պայմանաւորուած է հանրային աջակցութիւն ստացած օրակարգերի առաջմղմամբ, այն է՝
–Հայաստանի ու Արցախի անվտանգութիւնը,
–օրուայ իշխանութիւնների պաշտօնանկութիւնը
-երկրի հզօրացման ազգային-պետական ուղեգծի հաստատումը։
Ի յաւելումն նշուածի ժողովրդի կողմից ստացած մանդատը խմբակցութիւնն օգտագործելու է՝ հանրային իրական հետաքրքրութիւն ու հնչեղութիւն ունեցող թեմաներով լսումների կազմակերպման, գործող իշխանութիւնների ապազգային, հակապետական նախաձեռնութիւնները, նրանց կողմից երկրի սոցիալ–տնտեսական խնդիրները լուծելու անկարողութիւնը, կոռուպցիոն երեւոյթները, դատաիրաւական համակարգի ամենաթողութիւնը, մարդու իրաւունքների եւ ժողովրդաւարութեան խախտումները բացայայտելու եւ դրանց դէմ պայքարի ուղղութեամբ:
Խմբակցութիւնն իր ներկայացուցիչների միջոցով շարունակելու է ակտիւ շփումներն ու աշխատանքները արտէրկրի մեր գործընկերների ու Հայաստանում հաւատարմագրուած դիւանագիտական ներկայացուցչութիւնների հետ, ինչպէս նաեւ դրանց օգտակարութիւնը եւ արդիւնաւետութիւնը գնահատելով՝ մասնակցելու է միջազգային հանդիպումներին մեր երկրի շահերը պաշտպանելու, հայ ժողովրդի նկատմամբ կատարուած յանցագործութիւնները բարձրաձայնելու եւ դատապարտելու համար։ Ըստ անհրաժեշտութեան կիրառուելու են նաեւ պետական ու հանրային օրակարգերը սպասարկող խորհրդարանական այլ գործիքները:
Միեւնոյն ժամանակ շարունակելու ենք ակտիւ գործունէութիւն իրականացնել ԱԺ-ից դուրս՝ մեր երկրին սպառնացող վտանգների մասին հանրային լայն շրջանակներին իրազեկելու, քաղաքական գործընթացներում ուղղակի մասնակցութիւն ապահովելու, «Դիմադրութեան» շարժմանը նոր թափ հաղորդելու, ներքին ու արտաքին անվտանգային քաղաքական խնդիրները լուծելու նպատակով։
Յարգելի՛ հայրենակիցներ,
Մենք համոզուած ենք, որ իշխանափոխութիւնն այն անհրաժեշտ նուազագոյն պայմանն է, որի դէպքում է միայն հնարաւոր լուծել մեր երկրի առաջ ծառացած խնդիրները, յաղթահարել մարտահրաւէրները, փակել պարտութեան էջը, դուրս գալ այս նուաստացած վիճակից: Հայաստանը չի կարող աշխարհին ներկայանալ պարտութեան ու խայտառակութեան խորհրդանիշ հանդիսացող դէմքով: Բացառապէս Հայաստանի շահերը ներկայացնող նոր բանակցողը միայն կարող է իրական ու արժանապատիւ խաղաղութիւն ապահովել եւ տանել մեր երկիրը զարգացման ճանապարհով:
«Հայաստան» խմբակցութիւն
09.09.22թ.
