Երեւանի ընդհանուր իրաւասութեան դատարանում այսօր՝ օգոստոսի 2-ին, ՀՅԴ անդամ Գերասիմ Վարդանեանի գործով դատական նիստին նրա պաշտպան Բենիկ Գալստեանը դատարանին միջնորդութիւն ներկայացրեց իր պաշտպանեալին կալանքից ազատելու վերաբերեալ։
Գալստեանը միջնորդեց կամ կիրառել գրաւ՝ 3 միլիոն դրամի չափով, կամ անձնական երաշխաւորութեամբ ապահովել նրա ազատ արձակումը։
«Եթէ դատարանը գտնի, որ հնարաւոր չէ երաշխաւորութեամբ ապահովել նրա պատշաճ վարքագիծը, ապա միջնորդում ենք նաեւ նրա նկատմամբ ընտրուած խափանման միջոց կալանաւորումը փոխարինել գրաւով, որի չափը սահմանել 3 միլիոն 100 հազար դրամ։ Գերասիմ Վարդանեանի նիւթական վիճակը մեղմ ասած ոչ բարվօք վիճակում է, ունի անչափահաս երեխայ, տարէց ծնողներ, հաշմանդամութիւն ունեցող եղբայր։ Խափանման միջոցը փոփոխուեր երաշխաւորութեամբ»,- նշեց նրա պաշտպանը։
Գերասիմ Վարդանեանին ազատ արձակելու համար երաշխաւորութեամբ էին հանդէս եկել ԱԺ «Հայաստան» խմբակցութեան պատգամաւորներ Արամ Վարդեւանեանը, Աշոտ Սիմոնեանը, Աննայ Գրիգորեանը եւ Մաթեւոս Աւէտիսեանը։
Դատարանը լսելով կողմերին՝ մերժեց ներկայացուած միջնորդութիւնը։
Նշէնք, որ նա մեղադրւում է 2020 թուականի նոյեմբերի 9-ի իրադարձութիւններով յարուցուած քրէական գործով։ Սակայն դատարանը որոշել էր նրան կալանաւորել այս տարուայ մայիսի 12-ին։
