Արցախից միշտ էլ հրաւէրներ եղել են, բայց ցաւօք սրտի, ոչ միշտ է, որ ՀՀ իշխանութիւններն արձագանգում են: Այս մասին News.am-ի հետ զրոյցում նշեց Արցախի ԱԺ ՀՅԴ խմբակցութեան պատգամաւոր Արթուր Մոսիեանը՝ անդրադառնալով նրան, որ Արցախի ԱԺ նախագահ Արթուր Թովմասեանը հրապարակաւ հրաւէր է ուղարկել Հայաստանի ԱԺ բոլոր խմբակցութիւններին՝ մասնակցելու Սեպտեմբերի 2-ին Արցախի անկախութեան տարեդարձին:
«Աւելին, միշտ սեպտեմբերի 21-ին Հայաստանի կողմից է հրաւէր եղել Արցախի իշխանութիւններին, բայց վերջին անգամ միայն համերգի հրաւիրեցին Արցախի ԱԺ նախագահին, որը չմասնակցեց, եկաւ Եռաբլուր եւ վերադարձաւ:
Այս պահին Հայաստանի եւ Արցախի իշխանութիւնների միջեւ կապ, որպէս այդպիսին, չկայ: Կայ Նիկոլ Փաշինեան-Արայիկ Յարութիւնեան անձնական կապ: Նրանք միջպետական յարաբերութիւնները վերածել են աննական յարաբերութիւնների: Ոչ ԱԳՆ-ի, որ խորհրդարանի, ոչ Անվտանգութեան խորհրդի մակարդակով որեւէ յարաբերութիւն չկայ, բացի հումանիտար 1-2 խնդրի լուծման համար կապից»,- ասաց Մոսիեանը:
Նա նկատեց, որ Արցախի ԱԺ նախագահն անուղղելի լաւատես է այդ հարցում, որովհետեւ տասնեակ հրաւէրներ են եղել եւ բացի ընդդիմադիր խմբակցութիւններից, որեւէ մէկն Արցախ չի գալիս:
Դիտարկմանը, թէ սեպտեմբերի 2-ին Արցախ չայցելելով, ՔՊ-ականները գուցէ որոշակի մեսիջ են յղում Բաքւին, Մոսիեանն արձագանգեց. «Մինչեւ Ադրբեջանին մեսիջ ուղարկելը մեր ՔՊ-ական իշխանութիւնն, աւելի լաւ է, դրական մեսիջներ փոխանցի Արցախին եւ ցոյց տայ, որ Արցախի այս ծանր, վիրաւոր վիճակում ինքը Արցախի կողքին է: Ես ոչ թէ հոռետես եմ, այլ տառապանքս փորձ ունի: Ձեզ չի՞ հետաքրքրում, թէ ինչու ՀՀ իշխանութիւնները չեն այցելում Արցախ: Ես աւելի քան վստահ եմ, որ որեւէ մէկը բարձր մակարդակով չի այցելի: Աւելին, կարող է նորից ցանկ տան, որ ընդդիմադիրներն էլ չայցելեն»:
ՀՅԴ-ական պատգամաւորը նաեւ յաւելեց. «Վերջին ժամանակներս Նիկոլ Փաշինեանի եւ Իլհամ Ալիեւի արած արտայայտութիւնները Արցախի վերաբերեալ փոքր տարբերութիւններով, չեն տարբերւում»:
