Սլովակիայի պաշտպանութեան նախարար Ռոբերտ Կալինիակը (Robert Kaliňák) այս տարւայ փետրւար եւ մարտ ամիսներին տւած հարցազրոյցներում երկու անգամ յայտարարել է, թէ իբր Հայաստանը օկուպացրել էր Ադրբեջանի տարածքը: Սրան ի պատասխան՝ Նիկոլ Փաշինեանի կառավարութիւնը որեւէ քայլ չի ձեռնարկել, որեւէ պարզաբանում, բացատրութիւն չի ուզել, բողոքի յայտագիր (նոտա) Սլովակիային չի ներկայացրել: Այս մասին գրում է «Հետք» պարբերականը:
Փետրւարին տեղական TA3 հեռուստաընկերութեանը տւած հարցազրոյցում իր խօսքի մէջ Ռ. Կալինիակը որպէս օրինակ նշել է, թէ իբր Հայաստանը օկուպացրել էր Ադրբեջանի տարածքը՝ նկատի ունենալով Արցախը: Հարցազրոյցը Smer-SD կուսակցութեան ու Կալինիակի ֆէյսբուքեան պաշտօնական էջերում տեղադրւել է փետրւարի 21-ին:
Ռուս-ուկրաինական պատերազմի համատեքստում արձագանգելով լրագրողի դիտարկմանը, որ Ուկրաինայում չեն կարող ընտրութիւններ անցկացւել, քանի որ այդ երկրի սահմանադրութիւնն արգելում է դրանց կազմակերպումը օկուպացիայի ժամանակ՝ Սլովակիայի ներկայիս ռուսամէտ կառավարութեան ներկայացուցիչ Կալինիակն ասել է. «Եթէ այն (նկատի ունի Ուկրաինան – հեղ.) միակը լինէր, որն օկուպացւել է, ես ոչինչ չէի ասի: Բայց Կիպրոսում ընտրութիւնները վատ չեն անցնում, ընդորում՝ երկրի 1/3-ը օկուպացւած է արդէն 40 տարի: Սա՝ առաջին դէպքը: Երկրորդ դէպքը՝ երբ ընտրութիւններ են անցկացւել շատ այլ տարածքներում. երբ Հայաստանը օկուպացրել էր Ադրբեջանը, բայց չնայած դրան՝ Ադրբեջանում տեղի են ունեցել որոշ գործընթացներ: Նման բազմաթիւ դէպքեր կան»:
ՀՀ կառավարութիւնը որեւէ կերպ չի արձագանգել այս յայտարարութեանը, մեր երկրում Սլովակիայի ռեզիդենտ դեսպան Միրոսլաւ Հացեկը (Miroslav Hacek, դեսպան է 2022-ից) ՀՀ ԱԳՆ չի հրաւիրւել, նրանից բացատրութիւն չի պահանջւել, Սլովակիայի կառավարութեանը հայկական կողմը բողոքի յայտագիր (նոտա) չի ներկայացրել, Սլովակիայում ՀՀ դեսպանութիւնը լռութիւն է պահպանել (այդ երկրում ՀՀ դեսպանը 2024-ից Անդրանիկ Յովհաննիսեանն է (նստավայրը՝ Վիեննա), որը միաժամանակ մեր դեսպանն է Աւստրիայում, Շւէյցարիայում, ինչպէս նաեւ ՀՀ մշտական ներկայացուցիչը ԵԱՀԿ-ում ու ՄԱԿ-ի Վիեննայի գրասենեակում):
Սլովակիայի հայ համայնքում վրդովւած են, որ ՀՀ կառավարութիւնը որեւէ կերպ չի արձագանգել սլովակ բարձրաստիճան պաշտօնեայի շարունակական ստերին: Համայնքում «Հետքի» աղբիւրը նշում է, որ ՀՀ ԱԳՆ-ն բողոքի նոտա չի ներկայացնում Սլովակիայի իշխանութիւններին, եւ Ռոբերտ Կալինիակը շարունակում է ադրբեջանական կեղծ թէզերի տարածումը:
Կարծել, թէ ՀՀ կառավարութիւնը կամ ԱԳՆ-ն չի իմացել այս յայտարարութիւնների մասին, միամտութիւն կը լինի, քանի որ հայ համայնքը դրանց արագ է արձագանգել, հետեւաբար անտեղեակութեան մասին խօսք չի կարող լինել:
Այս կապակցութեամբ Վահէ Սարգսեանն իր Ֆէյսբուքի էջում հետևեալ գրառումն է կատաել:
Շատէրը նեղուել են Սլովակիայի պաշտպանութեան նախարարի ասածներից, շատերը նրա «պորտը տեղն են դնում»՝ ինչ-որ բաներ Եւրոպայից յիշելով:
Իզուր:
2022 թ. հոկտեմբերին Պրագայում Արցախը ճանաչելով Ադրբեջանի մաս՝ Նիկոլ Փաշինեանը դրանով իսկ ոչ միայն անուանել, այլեւ հռչակել է Հայաստանը որպէս օկուպանտ երկիր:
Սլովակիայի պաշտպանութեան նախարարն ընդամէնը արձանագրել է Նիկոլ Փաշինեանի գործողութիւնների արդիւնքները:
Հետևաբար, «բոլոր ճանապարհները տանում են Հռոմ», այն է՝ Երևան, Հանրապետության հրապարակ, Կառավարական տուն 1:
