Վահէ Հովհաննիսեան
Այլընտրանքային նախագծեր խումբ
Հայաստանի քաղաքական դաշտը կանգնած է մի ընտրութեան առջեւ, որի հետ այս իշխանութիւնները կապ չունեն։ Այդ ընտրութեան էութիւնը հետեւեալն է. գալիք ընտրութիւններում պայքարել իշխանութեօ՞ւն, թե՞ ընդդիմութիւն վերցնելու համար։
Առաջին դէպքում՝ դա այլ հոգեվիճակով, ընդգծուած վճռականութեամբ, սեփական հնարաւորութիւնները իրական գնահատելով ընտրութեան գնալն է, միւսը՝ ընդդիմադիր կոմֆորտի համար պայքարը, որի մօտիւացիան բացառապէս անձնական է։
Իշխանութիւնը բնականաբար ունի իր հաշուարկները, եւ նրան ձեռնտու է 2021-ի մրցակցային պատկերը։ Իշխանութիւնը բնականաբար հասկանում է, որ չունի նախկին ձայները (680 հազար), բայց հասկանում է նաեւ, որ միւսները նոյնպէս չունեն իրենց արձանագրած ցուցանիշները։ Համաչափ (կամ նոյնիսկ անհամաչափ) կորուստներով նոյն մրցակցային դաշտը հնարաւորութիւն է տալու իշխանութեանը՝ վերարտադրուելու։
Իշխանութիւնն անթաքոյց գնում է ընտրութիւնների։ Արտահերթ թէ հերթական ընտրութիւններով այս իշխանութեանը յաղթելու եւ երկրում խորքային ռեստարտ ունենալու համար անհրաժեշտ են նոր ուժեր, նոր միաւորներ, նոր դաշինքներ, նոր գաղափարներ։ Այստեղ սիրել-չսիրելու հարց չէ, եւ յատուկ ընդգծեմ, ներկայ-նախկին հարց չէ. առաջիկայ ընտրութիւններին մասնակցելու իրաւունք եւ յաջողութեան հաւանականութիւն ունեն նաեւ 2021-ի դերակատարները։ Այլ հարց է, որ դա պէտք է արուի ճիշտ ձեւաչափերով ու ճիշտ ասելիքով։
Վստահ եմ, որ առաջիկայ ընտրութիւններում, լինի հերթական, թէ արտահերթ, աւելի քան հնարաւոր է յաղթել եւ ձեւաւորել նոր իշխանութիւն։ Բայց դա հնարաւոր է անել, եթէ լինէն նոր միաւորներ, նոր, թեկուզ այս պահին անհաւանական թուացող դաշինքներ, նոր ասելիքով։ Գոնէ այն պարզ պատճառով, որ այսօրուայ եւ 2021-ի իրականութիւնները լրիւ տարբեր են։
Պարզ ասած. իշխանութիւնը գնալու է ընտրութիւնների՝ բացառապէս իշխանութիւն պահելու համար. այն Հայաստանին առաջարկելու ոչինչ չունի։ Եթէ մենք կարողանանք ձեւաւորել հաւաքական ուժ (ուժեր), որոնք գնալու են ընտրութեան՝ իշխանութիւն վերցնելու եւ Հայաստանին նոր բան առաջարկելու համար, ունենալու ենք յաջողութիւն։ Իսկ եթէ դրուող խնդիրը հերթական անգամ ընդդիմութեան մէջ լինելն է, ապա դա մասնաւոր շահի սպասարկում է, եւ ընդդիմադիր ուժերի ճարտարապետներն ու մասնակիցները դա պէտք է հէնց սկզբից ազնուօրէն ընդունեն։ Հայ ընտրողը պատրաստ է դուրս գալ տնից եւ գնալ ընտրատեղամաս, եթէ տեսնի, որ իշխանութիւն փոխելու խնդիր եւ հնարաւորութիւն իրօք դրուած է։
