Մեծի Տանն Կիլիկիոյ կաթողիկոս Արամ Առաջինը, անդրադառնալով Արցախում տիրող վիճակին, ասել է, որ կաթողիկոսութիւնը չի կարող անտարբեր եւ լուռ մնալ, եւ յայտարարել, որ Արցախի անկախութիւնը սակարկութեան առարկայ չի կարող լինել: Այդ մասին կաթողիկոսը խօսել է ապրիլի 17-ին Անթիլիասի Մայրավանքում սուրբ Յարութեան տօնի պատարագի իր պատգամում։ Գրում է «Panarmenia.am»-ը:
Դիմելով Արցախի հայրենակիցներին՝ Արամ Ա-ն ասել է. «Արցախի ժողովո՛ւրդ, մենք ձեզ հետ ենք, բառիս ամենազօրեղ իմաստով։ Անկախութիւնը եւ արդարութիւնը Աստւածատուր արժէքներ եւ իրաւունքներ են։ Արցախի ժողովուրդը հաստատել եւ ամրապնդել է իր անկախութիւնն այն հողի վրայ, ուր դարեր շարունակ ապրել եւ ստեղծագործել է, ուստի՝ . ժողովրդի անկախութիւնը չի՛ կարող սակարկութեան նիւթ դառնալ»։
Վեհափառը տագնապալի է անւանել նաեւ Հայաստանում տիրող վիճակը։ Նա նշել է, որ Հայաստանի համար պատասխանատուները, ժողովուրդը, ինչպէս նաեւ Արցախի ժողովուրդը, պէտք է կարողանան հաւաքական կամք դրսեւորել ԱՀ ազատ ապրելու իրաւունքի հարցում:
Յիշեցնենք, որ ՀՀ Վարչապետ Նիկոլ Փաշինեանը, Ազգային ժողովում ներկայացնելով 2021թ․ կատարողականի հաշւետւութիւնը, յայտարարել է, որ միջազգային հանրութիւնը հայկական կողմին ասում է՝ «մի փոքր իջեցրեք ԼՂ կարգավիճակի հարցում ձեր նշաձողը»։ «Հակառակ դէպքում, նրանք խնդրում են իրենց վրայ յոյս չդնել՝ ոչ թէ չեն ցանկանում օգնել, այլ այն պատճառով, որ չեն կարող»,-ասել է նա։ Փաշինեանն ասել է նաեւ, որ Ադրբեջանի հետ խաղաղութեան պայմանագրի ստորագրումը, «որքան հնարաւոր է արագ, հայկական կողմի պլաններում է»՝ յաւելելով, որ սակայն, որ պատրանքներ այս հարցում չկան։
Արցախի Ազգային ժողովն արտահերթ նիստում յայտարարութիւն է ընդունել՝ պահանջելով ՀՀ իշխանութիւնից հրաժարւել իր որդեգրած ներկայիս աղէտալի դիրքորոշումից։ Յայտարարութիւնն ընդունւել է միաձայն։
