ԱՄՆ պէտքարտուղարութիւնը պատասխանել է «Ամերիկայի ձայնի» հայկական ծառայութեան հարցերին՝ հայ-ամերիկեան զօրավարժութիւնների ու Բաքուից հնչած արձագանքի, ինչպէս նաեւ այս նոյեմբերին Միացեալ Նահանգներում կայանալիք ընտրութիւններից յետոյ Հայաստանի հարցում ԱՄՆ քաղաքականութեան մէջ հնարաւոր փոփոխութիւնների մասին
Արձագանքելով զօրավարժութիւններին եւ Ադրբեջանից հնչած յայտարարութիւններին՝ ԱՄՆ պէտքարտուղարութիւնը շեշտել է, որ «Միացեալ Նահանգները երկարամեայ գործընկերութիւն ունի Հայաստանի հետ, որի օրինակն է Կանզաս [նահանգի] ազգային գուարդիայի հետ նրանց կայուն համագործակցութիւնը՝ [ԱՄՆ] պաշտպանութեան նախարարութեան Պետական գործընկերութեան ծրագրի շրջանակներում»։
Պետքարտուղարութիւնը յաւելել է, որ «ԱՄՆ-ն առանձին պաշտպանական եւ անվտանգային յարաբերութիւններ ունի Ադրբեջանի հետ, ներառեալ՝ համագործակցութիւնը բազմազգ զօրավարժութիւններում՝ Վրաստանում վերջերս տեղի ունեցած Agile Spirit, ՆԱՏՕ-ի Գործընկերութիւն հանուն խաղաղութեան եւ մի շարք այլ երկկողմ ձեւաչափերով՝ [ԱՄՆ] պաշտպանութեան նախարարութեան Պետական գործընկերութեան ծրագրի նման»։
Անդրադառնալով հարաւկովկասեան տարածաշրջանային կայունութեան վերաբերեալ հարցին՝ ամերիկեան արտաքին քաղաքականութեան գերատեսչութիւնը ընդգծել է, որ «Հայաստանը եւ Ադրբեջանը շարունակում են զգալի առաջընթաց գրանցել խաղաղութեան համաձայնագրի վերջնական ձեւակերպման ուղղութեամբ, եւ մենք յանձնառու ենք այդ գործընթացի աջակցմանը։ Եկել է խաղաղութեան ժամանակը»:
Պատասխանելով ամերիկեան վարչակազմի հնարաւոր փոփոխութիւնից յետոյ ԱՄՆ արտաքին քաղաքականութեան փոփոխութեան մասին հարցին՝ Միացեալ Նահանգների պէտքարտուղարութիւնը յայտնել է. «Պետքարտուղարութիւնը անկուսակցական հաստատութիւն է։ Միացեալ Նահանգների կառավարութեան արտաքին քաղաքականութիւնը կարող է փոխուել տարբեր նախագահական վարչակազմերի օրօք։ Այնուամենանիւ, ԱՄՆ արտաքին քաղաքականութեան հիմնական սկզբունքները մնում են անփոփոխ, որոնք ներառում են անվտանգութեան, ժողովրդաւարութեան, բարգաւաճման եւ զարգացման խթանում Միացեալ Նահանգներում եւ ողջ աշխարհում»:
VOA
