Սիրելի հայրենակիցներ,
Մարտի 18-ին Տաւուշի մարզում Նիկոլ Փաշինեանի հնչեցրած յայտարարութիւնները հաստատում են ընթացող բանակցային գործընթացում ադրբեջանական նախապայմանները միակողմանիօրէն բաւարարելու մեր բոլոր մտահոգութիւնները:
Մասնաւորապէս.
- Առանց վերջնական համաձայնութեան եւ փոխադարձութեան սկզբունքի պահպանման՝ հատուածական սահմանազատումն ու սահմանագծումը ամբողջութեամբ բխում է Ադրբեջանի շահերից:
- Հատուածական սահմանազատման եւ սահմանագծման գործընթացը հէնց Տաւուշի մարզից սկսելը յանգեցնելու է ՀՀ առաջնագծի ամենաամուր եւ կահաւորուած հատուածի կազմաքանդմանը, էապէս ջլատելու է ՀՀ պաշտպանական հնարաւորութիւններն այդ հատուածում, անմիջական վտանգներ է ստեղծելու սահմանամերձ բնակչութեան համար:
Ռազմավարական ճանապարհների նկատմամբ վերահսկողութեան փաստացի կորուստը բազմապատկելու է ՀՀ անվտանգային սպառնալիքները:
Սեփական ժողովրդին շարունակաբար պատերազմով սպառնալու միջոցով ադրբեջանական չդադարող պահանջների կատարումը ոչ միայն չի կանխելու Ադրբեջանի կողմից նոր պահանջների առաջ քաշումը, այլեւ պարարտ հող է ստեղծելու վերջինիս կողմից նոր ագրեսիւ գործողութիւնների համար:
Հօգուտ Ադրբեջանի սահմանազատման եւ սահմանագծման լաւագոյն փորձից հրաժարուելը, միջազգային փորձի անտեսումը ազգային կենսական շահերից հրաժարուելու վկայութիւնն են:
Հարկ է ընդգծել, որ հօգուտ այլ պետութեան Հայաստանի Հանրապետութեան ինքնիշխանութիւնը լրիւ կամ մասնակի սահմանափակելուն ուղղուած գործողութիւնները, տարածքներ յանձնելը պետութեան դէմ ծանրագոյն յանցագործութիւններ են:
«Հայաստան» խմբակցութիւն
19.03.2024 թ.
