Ռուս քաղտեխնոլոգ Կոնստանտին Կալաչովը Alpha News-ի հետ զրոյցում մեկնաբանել է ՌԴ ԱԳ նախարար Սերգեյ Լաւրովի յայտարարութիւնն այն մասին, որ Երեւանի դիրքորոշումը կարող է յանգեցնել ՌԴ-ի եւ Հայաստանի միջեւ յարաբերութիւնների վերանայման:
Փորձագէտի կարծիքով՝ Լաւրովի խօսքերն առաջարկ են՝ չշտապեցնելու որոշ իրադարձութիւններ, որոնք կապուած են Հայաստանի՝ Արեւմուտքի հետ համագործակցութեան վերակողմնորոշման հետ:
«Եթէ Հայաստանը չպարտադրի Հաւաքական անվտանգութեան պայմանագրի կազմակերպութիւնից (ՀԱՊԿ) դուրս գալը, ապա ոչինչ չի լինի։ Ըստ էութեան՝ պարզ ու հասկանալի է, որ Ռուսաստանը կցանկանար այնտեղ պահել Գիւմրիի իր ռազմաբազան։ Ես կարծում եմ, որ այս դէպքում դա պարզապէս ակնարկ չէ, այլ առաջարկ՝ չշտապեցնել որոշ իրադարձութիւններ, որոնք կապուած են Հայաստանի՝ Արեւմուտքի հետ համագործակցութեան վերակողմնորոշման հետ։ Թեեւ հասկանալի եւ ակնյայտ է, որ դա որեւէ կերպ չի ազդի Հնդկաստանի կամ Ֆրանսիայի հետ ռազմատեխնիկական համագործակցութեան վրայ։ Բայց ամէն դէպքում Լաւրովն ակնարկում է, որ շտապել պէտք չէ։ Քանի դեռ չի աւարտուել սահմանների դէմարկացիան եւ դելիմիտացիան, քանի դեռ չկայ Ադրբեջանի հետ խաղաղութեան պայմանագիր, քանի դեռ Ադրբեջանը չի ճանաչել Հայաստանն իր սահմաններով հանդերձ, Հայաստանը խոցելի է։
