ՀՅԴ Բիւրոյի Ուղերձը
Չարաբաստիկ 2023-ը կը մնայ մեր պատմութեան մէջ որպէս հայրենազրկման ու կորստի տարի: Դաւադիր պայմանաւորուածութիւնների ու յանցաւոր անգործութեան արդիւնքում հայաթափուեց Արցախը, ունեցանք Հայաստանի ինքնիշխան տարածքի նոր կորուստ, հարիւրաւոր նուիրական զոհեր, խեղուած մարդկային ճակատագրեր: Իրադարձութիւնների նման ընթացքը կանխելու ջանքը ցաւօք բաւարար չեղաւ: Անտարբերութեան, սեփական ուժերի նկատմամբ թերահաւատութեան, պառակտուածութեան, ազգային-պետական շահերի ստորադասման արմատացած դրսեւորումները այդպէս էլ չկարողացանք յաղթահարել: Ու դրա համար վճարեցինք շատ թանկ:
Աշխարհաքաղաքական, ռազմաքաղաքական եւ ներազգային խորքային վերափոխումների ներկայ հանգրուանում Հայաստանը եւ ողջ հայութիւնը տակաւին շարունակում են կանգնած մնալ ճգնաժամի եւ լրջագոյն մարտահրաւէրների առջեւ: Ստեղծուած իրավիճակի յաղթահարման համար հեշտ ու արագ լուծումներ չկան: Մենք խնդիր ունենք թէ՛ ներքին, թէ՛ արտաքին ճակատում: Արտաքին մարտահրաւէրները հնարաւոր չի լինի յաղթահարել առանց ներքին մարտահրաւէրները յաղթահարելու: Մեր բոլորի գերխնդիրն է, նոր կորուստներ ու կենսական զիջումներ, անվտանգային իրավիճակի վատթարացում թոյլ չտալը: Այս ամէնը մենք ի զօրու ենք անել, եթէ վերականգնենք հաւատը մեր ուժերի նկատմամբ ու մեր պաշարների ամբողջական գոյքագրմամբ պայքարենք ու գործենք առանց յոգնելու: Միայն այդկերպ կարող ենք կանխել կորուստների, պարտութեան ու ազգային նուաստացման այս կործանարար ընթացքը: Օրուայ հայրենադաւ վարչախմբի ու թուրք-ազրպէյճանական տանդեմի կողմից մեզ պարտադրուող սին «խաղաղութեան» օրակարգին մենք պէտք է հակադրենք մեր ազգային-պետական շահերից բխող իրական, արժանապատիւ խաղաղութեան օրակարգը, որը կ՛ապահովի ե՛ւ Հայաստանի Հանրապետութեան տարածքային ամբողջականութիւնը, անկախութիւնն ու անվտանգութիւնը, ե՛ւ Արցախի ժողովրդի ու Հանրապետութեան իրաւունքների պաշտպանութիւնը եւ ընդհանրապէս մեր ժողովրդի բարօրութիւնը:
Արդարութեան, արժանապատուութեան եւ հաւասարութեան արժեհամակարգերի վրայ հիմնուած մրցունակ, նոր որակի ազգային պետութեան կառուցումը պէտք է հռչակուի ազգային ռազմավարական նպատակ:
Մենք հաւատում ենք մեր ժողովրդի հաւաքական իմաստութեանն ու ուժին եւ վստահ ենք, որ միասին կարողանալու ենք բեկել պատմութեան ընթացքը:
ՀՅԴ ԲԻՒՐՕ
10 յունուար 2024
