Հայաստանի Ազգային ժողովի աշնանային նստաշրջանի առաջին նիստում, այսօր՝ սեպտեմբերի 11-ին, ՀՅԴ Հայաստանի ԳՄ անդամ, «Հայաստան» խմբակցութեան պատգամաւոր Գեղամ Մանուկեանը խօսք ուղղեց Արցախի Հանրապետութեան ժողովրդին։
«Այս դժուարին օրերին սեփական հայրենիքում ազատ ապրելու, ինքնորոշման իրաւունքը պաշտպանելու եւ դժուարին մարտահրաւէրները դիմագրաւող Արցախի Հանրապետութեան սիրելի հայրենակիցներ.
Ազգային ժողովի մեկնարկող նստաշրջանի օրակարգում թերեւս կարող էր առաջին կէտը լինել շաբաթ օրը Արցախի Ազգային ժողւում Արցախի Հանրապետութեան նախագահ Սամուել Շահրամանեանի ընտրութեան հետ կապուած Հայաստանի խորհրդարանի կողմից ողջոյնի ուղերձ յղելու հարցը։
Ամէն դէպքում Հայաստանի Ազգային ժողովի այս բարձր ամբիոնից ցանկանում եմ մեր գործընկերների, հայրենակիցների անունից ողջունել Արցախի մեր քաղաքացիներին, հայրենակիցներին, որոնց ներկայացնող մարմինը՝ Ազգային ժողովը, հանդէս բերեց վճռականութիւն, միասնականութիւն, պահի թելադրանքն ամբողջութեամբ գիտակցնելով՝ առաջին իսկ քուէարկութեամբ 22 կողմ ձայնով Արցախի նախագահ ընտրեց Սամուել Շահրամանեանին։
Շատ պատասխանատու փուլ Արցախի համար, երբ որ երկիրը դիմագրաւում է լուրջ մարտահրաւէրների՝ քաղաքական, ռազմաքաղաքական, ներքին, հումանիտար, բայց Արցախում ընտրուեց նախագահ, որից հայ ժողովուրդն ակնկալում է վճռականութիւն, որոշում կայացնելու ունակութիւն, հանրութեանը համախմբելու եւ բոլոր այս մարտահրաւէրները դիմագրաւելու յամառութիւն եւ կամք։
Հայաստանի հասարակութիւնը, հայ ժողովուրդը շնորհաւորել է Սամուել Շահրամայանին, որոշ երկրներ՝ Ուկրաինայ, Թուրքիայ, դատապարտել են այս ընտրութիւնը, որքան էլ զարմանալի է՝ պաշտօնական Երեւանից մինչ օրս որեւէ շնորհաւորական ուղերձ Արցախ նորընտիր նախագահ Սամուել Շահրամանեանին, չի յղուել»։
