Դադիվանքի վաղեմութեան ու հայկականութեան մասին փաստում են վանքի պատերի վրայ պահպանուած արձանագրութիւններն ու վանքի տարածքում գտնուող հնագոյն խաչքարերը: Վանքի կառուցման մասին պատմական տեղեկութիւններ ու վկայութիւններ կան արտասահմանեան տարբեր գրականութեան մէջ եւ մասնագիտական աշխատութիւններում:
Մոսկուայի եւ Համայն Ռուսիոյ Կիրիլ Պատրիարքի օրհնութեամբ եւ խմբագրութեամբ հրատարակուած Ուղղափառ հանրագիտարանում ներկայացուած է Դադիվանքի կառուցման, անուան ծագումնաբանութեան, դարերի ընթացքում յարձակումների եւ աւերածութիւնների ենթարկուած եւ կանգուն մնացած հայկական սրբավայրի մասին։ Աշխատութեան մէջ մանրամասն ներկայացուած են վանական համալիրում գտնուող շինութիւնների մասին պատմական փաստէրն ու նկարագրութիւնները։ 2014 թուականին ճարտարապետ Արայ Զարեանի եւ Իտալիայից ժամանած վերականգնող Քրիստին Լամուրէի համատեղ ջանքերով մեկնարկեց Դադիվանքի որմնանկարների վերականգնման գործընթացը, որը շարունակուեց մինչեւ 2017 թուականը։ Մասնագէտները կատարուած աշխատանքների մասին մանրամասն ներկայացրել են իրենց կողմից հեղինակած «1214 թուականին կառուցուած Կաթողիկէ եկեղեցու 1297 թուականի որմնանկարների պահպանական վերականգնում» գրքի մէջ։
Գիրքը սկսւում է Դադիվանքի պատմութեամբ ու նկարագրութեամբ, որին շարունակում են մասնագէտների կողմից կատարուած աշխատանքների արդիւնքներն ու բացայայտումները։ Մասնագէտների ծաւալուն աշխատանքի արդիւնքում վերջնականապէս պարզ դարձաւ Սուրբ Կաթողիկէ եկեղեցու ներսի որմնանկարների պատմական տեսարաններն ու որմնանկարների յստակ տարեթիւը՝ 1297թ., որի մասին փաստում է եկեղեցու հարաւային պատի պատուհանի անմիջապէս ստորին հատուածում զետեղուած երեք տողով հայերէն որմնագիր արձանագրութիւնը՝ ՉԽԶ (Չ=700; Խ=40; Զ=6 ուրեմն’ 746+551=1297)։
Մասնագէտները մաքրել եւ վերականգնել են եկեղեցու հիւսիսային եւ հարաւային պատերի որմնանկարները, որտեղ պատկերուած են Սբ. Նիկողաեօս Սքանչելագործի հայրապետական իշխանութեան ընծայման վարքագրական դրուագն ու Սբ. Ստեփանոս Նախաւկայի քարկոծութեան տեսարանը։ Որմնանկարների վերականգնման արդիւնքում ի յայտ եկան տեսարանները բնութագրող մի շարք հայատառ արձանագրութիւններ։
