2023թ. ապրիլի 23-ին Ադրբեջանի իշխանութիւնները, կոպտօրէն խախտելով 2020թ․ նոյեմբերի 9-ի եռակողմ յայտարարութեան 6-րդ կէտը, արդէն պաշտօնապէս արգելափակել են Լաչինի միջանցքը՝ քայլեր ձեռնարկելով միջանցքում՝ ՌԴ խաղաղապահ զօրակազմի պատասխանատուութեան գօտում անցակէտ տեղադրելու ուղղութեամբ, նշւում է ՀՀ ԱԳՆ յայտարարութեան մէջ։ Գրում է Yerkir.am-ը։
«Ադրբեջանի զինւած ուժերի կողմից այսօր իրականացւած այս քայլը չի կարելի համարել Ադրբեջանի հերթական սադրանք անգամ․ այն իրապէս 2020թ․ նոյեմբերի 9-ի եռակողմ յայտարարութեան հիմնարար դրոյթներից մէկի աղաղակող խախտում է՝ միտւած Լեռնային Ղարաբաղում էթնիկ զտումներ իրականացնելու եւ Լեռնային Ղարաբաղն ամբողջութեամբ հայաթափելու իր քաղաքականութեան հետեւողական իրագործմանը։ Նախորդ տարւայ դեկտեմբերի 12-ից շինծու բնապահպանական պատրւակներով Լաչինի միջանցքի շարունակական ապօրինի արգելափակումը եւ այսօր արդէն ակնեայտ կեղծ եւ անհիմն պատրւակներով անցակէտի տեղադրումը հէնց այս ծրագրւած քաղաքականութեան հետեւողական իրականացման հերթական քայլերն են։
Այս գործողութիւնն իրականացւում է ի հեճուկս միջազգային հանրութեան միանշանակ յայտարարութիւնների եւ յատկապէս Միջազգային արդարադատութեան դատարանի՝ 2023թ. փետրւարի 22-ի իրաւաբանական պարտադիր ունեցող վճռի: Աւելին, Ադրբեջանի ղեկավարութիւնը նոյնիսկ ջանք չի գործադրում ոչ միայն ձեռք բերւած հանրայայտ պայմանաւորւածութիւնները կատարելու, այլեւ իր կողմից միջազգային իրաւունքի հիմնարար նորմերի շարունակական խախտումները կոծկելու ուղղութեամբ եւ ամէն կերպ լարում է տարածաշրջանային իրավիճակը` հող նախապատրաստելով լայնածաւալ ուժի կիրառման համար։
Հայաստանի Հանրապետութիւնը՝ որպէս նոյեմբերի 9-ի եռակողմ յայտարարութեան ստորագրող կողմ, անընդունելի է համարում եւ խստօրէն դատապարտում է Ադրբեջանի՝ Լաչինի միջանցքում ապօրինի անցակէտ տեղադրելու այս քայլը։ Այն, ինչպէս նաեւ Ադրբեջանի կողմից մինչ այդ իրականացւած նմանօրինակ գործողութիւնները՝ զուգորդւած չդադարող հայատեաց ու սպառնալից հռետորաբանութեամբ, միտւած են տապալելու Հայաստանի եւ Ադրբեջանի միջեւ յարաբերութիւնների կարգաւորման փաստաթղթի շուրջ բանակցութիւնները:Կոչ ենք անում Ռուսաստանի Դաշնութեանն ի վերջոյ կատարել եռակողմ յայտարարութեան 6-րդ կէտով ստանձնած իրենց պարտաւորութիւնը՝ վերացնելով միջանցքի ապօրինի արգելափակումը եւ ապահովելով ադրբեջանական ուժերի դուրսբերումը Լաչինի միջանցքի ողջ անվտանգութեան գօտուց, իսկ միջազգային անվտանգութեան մանդատով օժտւած ՄԱԿ-ի անդամ պետութիւններին յստակօրէն արձանագրել Ադրբեջանի կողմից տարածաշրջանային անվտանգութիւնը խարխլող գործողութիւնները եւ գործուն քայլեր ձեռնարկել միջազգային բարձրագոյն դատական ատեանի վճռի անուէրապահ կատարման ուղղութեամբ»,- նշւում է յայտարարութեան մէջ:
