Եւրոպայի մէջ Ազրպէյճանական հակաքարոզչութեան հակադարձելու, անոնց հերթական սադրանքը ձախողցնելու ուղիներ մշակուած են

ՀՅԴ Հայ Դատի Եւրոպայի գրասենեակին հրաւէրով, Ապրիլ 13-ին տեղի ունեցած է ՀՅԴ Հայ Դատի եւրոպական երկիրներու մէջ գործող յանձնախումբերու պատասխանատուներու առցանց քննարկում, որուն մասնակցած են աւելի քան տասը երկրի մէջ գործող Հայ Դատի յանձնախումբերու պատասխանատուներ։

Քննարկման օրակարգը վերաբերած է Հայ Դատի Եւրոպայի գրասենեակին եւ իւրաքանչիւր յանձնախումբի նախընթաց ամիսներու աշխատանքին վերագնահատման, ընթացիկ ու յառաջիկայ աշխատանքներուն՝ միտուած Ղարաբաղեան հիմնախնդրի ներկայ հանգրուանին եւ ազրպէյճանական շարունակական յարձակումներուն վերաբերեալ եւրոպական հասարակական-քաղաքական, պետական շրջանակներու հետ նպատակադրուած աշխատանքով առարկայական իրավիճակ ձեւաւորելուն։ Այս առումով գոհունակութեամբ անդրադարձ եղած է Եւրոպական Խորհրդարանին կողմէ ընդունուած վերջին բանաձեւերուն եւ կարեւոր համարուած է ԵՄ գործադիր իշխանութեան կողմէ խորհրդարանի քաղաքական դիրքորոշման հետեւելու անհրաժեշտութիւնը։ Յատուկ անդրադարձ եղած է Հայ Դատի Եւրոպայի գրասենեակի աշխատանքներուն իբրեւ արդիւնք Հայաստան ժամանող Եւրոպական Խորհրդարանի պատգամաւորներու այցերու արդիւնաւէտութեան եւ ընդգծուած անոնց շարունակականութեան ապահովման կարեւորութիւնը։

Առանձնայատուկ քննարկուած է ՀՅԴ Հայ Դատի Եւրոպայի գրասենեակին եւ անոր ղեկավար Գասպար Կարապետեանի դէմ սկիզբ առած կեղտոտ հակաքարոզչութեան նոր ալիքը, որ ինչպէս նախորդները, ուղղակիօրէն կը ղեկավարուին ազրպէյճանի բարձրագոյն ղեկավարութեան կողմէ։ Հանդիպման ընթացքին քննարկուած է Եւրոպայի մէջ կաշառակերութեան դրսեւորումներով իրականացուող ազրպէյճանական հակաքարոզչութեան իրաւական, հասարակական, քաղաքական եւ քարոզչական տեսանկիւններէն հակադարձելու եւ ազրպէյճանական հերթական սադրանքը ձախողելու ուղիները։

ՀՅԴ Բիւրոյի Հայ Դատի կեդրոնական գրասենեակ

14.04.2023 թ.