Յարութեան զօրացնող ուժն ենք հայցում Փրկչից յատկապէս Արցախի Մեր զաւակների համար, որպէսզի խիզախ ու անկոտրում լինէն ոգով եւ արցախցուն բնորոշ ամուր եւ անյողդողդ կամքով յաղթահարէն իրենց առջեւ ծառացած բոլոր փորձութիւնները։
Ամենայն Հայոց Կաթողիկոս
Կաթողիկոսի գլխավորությամբ Պատարագը մատուցվել է Երևանի Սուրբ Գրիգոր Լուսավորիչ եկեղեցում։ Ինչպես վերջին մի քանի տարիներին, այս անգամ էլ Սուրբ պատարագին չեն մասնակցել բարձրագույն իշխանության ներկայացուցիչները, մասնավորապես վարչապետը և իր նշանակած նախագահը:
Ապրիլի 9-ին Հայաստանեայց Առաքելական Սուրբ Եկեղեցին տօնախմբեց Հիսուս Քրիստոսի Հրաշափառ Սուրբ Յարութեան տօնը: Այս առիթով Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Սուրբ եւ Անմահ Պատարագ մատուցեց Երեւանի Սուրբ Գրիգոր Լուսաւորիչ մայր եկեղեցում: «Արմենպրես»-ին այս մասին յայտնեցին Մայր Աթոռի տեղեկատուական համակարգից։
Սրբազան արարողութեանը Վեհափառ Հայրապետին որպէս առընթերականեր սպասաւորում էին Մայր Աթոռի լուսարարապետ Գերաշնորհ Տ. Մուշեղ եպիսկոպոս Բաբայանն ու Մայր Աթոռի եկեղեցական հայեցակարգային բաժնի տնօրէն Գերաշնորհ Տ. Վազգէն արքեպիսկոպոս Միրզախանեանը։
Սուրբ Պատարագի ընթացքում Ամենայն Հայոց Կաթողիկոսը համայն հայութեանը յղեց հայրապետական իր պատգամը՝ փոխանցելով «Քրիստոս յարեաւ ի մեռելոց» հրեշտակաբարբառ աւետիսը:
Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը պատգամ է յղել Հիսուս Քրիստոսի Հրաշափառ Յարութեան տօնի առթիւ։
«Յանուն Հօր եւ Որդւոյ եւ Հոգւոյն Սրբոյ. ամէն:
«Երբ մարդու Որդին գայ, արդյօք
երկրի վրայ հաւատ կգտնի՞»
(Ղուկ. 18.8)։
Սիրելի բարեպաշտ ժողովուրդ ի Հայաստան, յԱրցախ եւ ի սփիւռս,
Այսօր համախմբուած մեր եկեղեցիների հարկերի ներքոյ՝ փառաբանում ենք յարուցեալ Փրկչին՝ աւետելով. «Քրիստոս յարեաւ ի մեռելոց»։ Օրհնաբանում ենք հրաշափառ Յարութիւնը մեր Տեր Հիսուս Քրիստոսի, Ով չարչարուեց, խաչուեց ու յարութիւն առաւ, որպէսզի մէզ ազատի մեղքի ու մահուան իշխանութիւնից, Ով աստուածային անսահման սիրով, Իր փրկագործութեամբ մարդկութեան համար բացեց յաւիտենութեան ու երկնքի արքայութեան ճանապարհը։
Քրիստոս ցրեց անհուսութեան խաւարը, յարութեան շնորհը պարգեւեց մարդկանց, նաեւ զօրացրեց՝ երկրային այս իրականութեան մէջ յառնելու տառապանքներից, չարի ներգործութեամբ աշխարհն ալեկոծող աղէտներից ու աւերածութիւններից։
Քրիստոսի խաչելութիւնից մինչ օրս փարիսեցիական խարդաւանքները, յուդայեական մատնութիւնները, պիղատոսեան դատավարութիւնները արհաւիրքներ են սփռում աշխարհում, աղճատում արարչաստեղծ մարդու կերպարն ու էութիւնը։ Այսպիսի իրողութիւնների յանդիման, արդարեւ, նոր ուժգնութեամբ է հնչում Քրիստոսի խօսքը. «Երբ մարդու Որդին գայ, արդյօք երկրի վրայ հաւատ կգտնի՞»։
21-րդ դարը, սիրելի բարեպաշտ ժողովուրդ, լուսաւորեալ նոր դարաշրջան պիտի լինէր գիտական ձեռքբերումներով, տեխնոլոգիական մեծ նուաճումներով, մարդու կեանքի, մարդու իրաւունքների ու արժանապատուութեան պաշտպանութեան միջազգային նորմերով ու օրէնքներով։ Բայց որքան անմեղ մարդիկ, որքան ժողովուրդներ են պատերազմների գողգոթաներում նեղութիւնների ու վշտէրի ենթարկւում, տառապանքների խաչին գամւում՝ անարդարութեան, գերիշխանութեան մոլուցքի, խտրականութեան պատճառով, պայքարում գոյաբանական սպառնալիքների դէմ։ Մենք եւս անցանք 44-օրեայ պատերազմի, Հայաստանի սահմանների վրայ յարձակումների աղէտալի իրողութիւնների միջով։ Մեր հայրենիքը ներքին եւ արտաքին մտահոգիչ մարտահրաւէրների պայմաններում դիմակայում է անվտանգ ու խաղաղ կեանքի ապահովման ամենօրեայ փորձութիւնների։ Յարազատ Արցախը տեւական ժամանակ շրջափակուած է եւ դիմագրաւում է անասելի դժուարութիւնների ու զրկանքների։ Այս անհանգստացնող, վտանգալի երեւոյթների յանդիման, մեր սրտէրում կրելով չամօքուող վիշտը մեր նահատակ, գերեւարուած, անյայտ կորած ու վիրաւոր զաւակների, ականատես ենք նաեւ ցաւալի այլ իրավիճակի, թէ ինչպէս են թշնամանքի, ատելութեան դրսեւորումները բաժանարար պատնէշներ դնում աշխարհասփիւռ մեր ժողովրդի կեանքում, խարխլում ազգային միաբանութիւնը։ Ականատես ենք, թէ ինչպէս են անտեսւում դարերով նուիրագործուած աւանդոյթները, մեր ինքնութեան հիմնասիւնը հանդիսացող արժեհամակարգը, խաթարւում մեր ժողովրդի ազգային-հոգեւոր անվտանգութիւնը, որը մեծապէս կարեւոր է մեր դէմ ծառացած լրջագոյն մարտահրաւէրների յաղթայարման համար։ Մեր կեանքում տեղ գտած նմանօրինակ ընթացքները, յատկապէս հետպատերազմեան շրջանում, աւելի են ծանրացնում կրած վշտի ու կորուստների ցաւը։ Եւ այսպիսի իրադրութեան մէջ ամենքիս համար առաւել ուժգնութեամբ է հնչում Քրիստոսի հարցադրումն ու յանդիմանութիւնը. «Երբ մարդու Որդին գայ, արդյօք երկրի վրայ հաւատ կգտնի՞» (Ղուկ. 18 8 ), «Ո՞ւր է ձեր հաւատը» (Ղուկ. 8.25)։
Հիրաւի, երբ պետական եւ հասարակական կեանքում արդարութիւնը եւ ճշմարտութիւնը դադարում են լինել առանցքը ձեռնարկումների ու իրագործումների, շարունակելու ենք առերեսուել պիղատոսականութեան դրսեւորումների։ Փարիսեցիական խարդաւանքները շարունակուելու են, քանի դեռ քինախնդրութեան եւ յիշաչարութեան մղումով սփռւում են զրպարտանք ու անիրաւութիւն։ Հուդայեական մատնութիւնները շարունակուելու են, քանի դեռ չէն դադարում ուրանալ Աստծուն ու սրբութիւնները, արժեզրկել հայրենիքի նուիրական գաղափարը։ Մինչդեռ պետութիւն, հասարակութիւն եւ ընտանիք ամուր ու զօրեղ են, երբ խարսխւում են աստուածադիր պատգամների, անանց արժէքների վրայ, որոնք բարօրութեան ուղենիշ են եւ առաջնորդում են երկնային զօրակցութեամբ արդիւնաւորելու ջանքերը՝ ի խնդիր ժողովրդի ապահւութեան, առաջընթացի ու բարգաւաճման։
Սիրելինէր, յարութեան հաւատքը յաղթանակ է փորձութիւնների դէմ, որին բնորոշ չէ վախի, յուսահատութեան, անկումի ոգին, աղէտաբեր դատապարտելի հաշտուողականութիւնը։ Որքան ծանր ու անելանելի թուայ ներկայ իրավիճակը, այնքան աւելի զօրաւոր ու հաստատուն պէտք է լինի մեր հաւատը։ Հաւատքը պիտի արտայայտուի իւրաքանչիւր քայլի ու արարքի մէջ՝ անձնական, հաւաքական ու համազգային անդաստանում։ Հաւատքով ու միաբանութեամբ ենք յաղթահարել մեր պատմութեան ընթացքում բազմաթիւ արհաւիրքներ, վերակերտել մեր անկախ պետականութիւնը եւ ստեղծագործ կեանք վերընձիւղել հայրենի հողի վրայ։ Այսօր էլ Աստծոյ հանդէպ, մեր ուժերի հանդէպ հաւատն է, որ պիտի զօրացնի մէզ՝ դուրս գալու ճգնաժամային իրավիճակներից, կառուցելու լուսաւոր ապագայ։
Արդ, ազգովի վերանորոգենք մեր հաւատը մեր Փրկչի հրաշափառ Յարութեան տօնախմբութեամբ եւ մեր կեանքով, մեր ամէն խօսքով ու գործով վկայենք մեր հաւատարմութիւնը Քրիստոսին, վկայենք մեր նախանձախնդրութիւնը հանդէպ մեր տէրունաւանդ հաւատքը եւ կերտենք յարուցեալ նոր իրականութիւն Քրիստոսի հետ։
Այս մաղթանքով եւ «Քրիստոս յարեաւ ի մեռելոց» աւետիսով եղբայրական Մեր ողջոյնն ենք յղում մեր Սուրբ Եկեղեցու Նուիրապետական Աթոռների գահակալներին՝ Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսին, Երուսաղեմի Հայոց Պատրիարք Ամենապատիւ Տ. Նուրհան արքեպիսկոպոս Մանուկեանին, Կոստանդնուպոլսի Հայոց Պատրիարք Ամենապատիւ Տ. Սահակ արքեպիսկոպոս Մաշալեանին։ Ամենայն բարեաց մաղթանքով Սուրբ Յարութեան հոգեպարար աւետիսն ենք բերում քոյր Եկեղեցիների հոգեւոր Պետէրին՝ հայցելով Ամենակալ Աստծոյ զօրակցութիւնը Քրիստոսապատուէր առաքելութեան արդիւնաւորման գործում։ Հայրապետական Մեր սէրն ու օրհնութիւնն ենք յղում մեր Սուրբ Եկեղեցու ողջ հոգեւոր դասին եւ հաւատաւոր Մեր ժողովրդին ի հայրենիս եւ ի սփիւռս։
Սուրբ Յարութեան այս լուսաշող օրը Մեր աղօթքն ենք վերառաքում առ Բարձրեալն Աստուած եւ խնդրում, որ Քրիստոսի Սուրբ Յարութեան կենսանորոգ շնորհներով փոխակերպուի ու բարեզարդուի աշխարհը, եւ մարդկութիւնը երկնային զօրակցութեամբ յառնի տառապանքներից ու նեղութիւններից, հաստատի բարիք ու խաղաղութիւն։ Յարութեան զօրացնող ուժն ենք հայցում Փրկչից յատկապէս Արցախի Մեր զաւակների համար, որպէսզի խիզախ ու անկոտրում լինէն ոգով եւ արցախցուն բնորոշ ամուր եւ անյողդողդ կամքով յաղթահարէն իրենց առջեւ ծառացած բոլոր փորձութիւնները։ Թող յարուցեալ Փրկիչը Իր շնորհներն ու ողորմութիւնը տարածեալ պահի հայրենի մեր երկրի՝ Հայաստանի ու Արցախի վրայ եւ Իր Սուրբ Աջի հովանու ներքոյ ապահւութեան ու բարօրութեան մէջ պահպանի համայն մեր ժողովրդին ի սփիւռս աշխարհի այսօր եւ միշտ եւ յաւիտեանս. ամէն։
Քրիստոս յարեաւ ի մեռելոց,
Օրհնեալ է Յարութիւնն Քրիստոսի»։