Նախկին ՀՀԿ-ական պատգամաւոր Աշոտ Արսենեանի ընկերութիւնը չի պարզաբանում, թէ երբ է պաշտպանութեան նախարար Սուրէն Պապիկեանն ամրագրել «Բիւրեղ» բնակելի համալիրում գտնուող թանկարժէք բնակարանը։
«Հետքը» նախորդ շաբաթ գրեց, որ 2022 թ․ յուլիսի 27-ին պաշտպանութեան նախարար Սուրէն Պապիկեանը 69 միլիոն դրամով (168 հազար ԱՄՆ դոլար) Երեւանում 165 քմ մակերեսով բնակարան է գնել։ Մենք հարց էինք բարձրացրել, թէ ինչպէս է հնարաւոր ներկայում 412 հազար դոլար արժեցող բնակարանը 6 ամիս առաջ 100 միլիոն դրամ պակաս արժէքն ունենայ։ Սուրէն Պապիկեանը մէզ առաջարկել էր այդ հարցի պատասխանը ստանալ բնակարանը վաճառող ընկերութիւնից։
Սուրէն Պապիկեանը 168․000 դոլարով բնայկարան է գնել, որն այսօր 412.000 դոլար արժէ
Մեր գրաւոր հարցմանն ի պատասխան՝ ՀՀԿ-ական նախկին պատգամաւոր Աշոտ Արսենեանին պատկանող «Ջերմուկ գրուպ» ՓԲ ընկերութեան տնօրէն Վլադիմիր Պողոսեանը գրաւոր յայտնել է, որ «հնարաւոր գնորդները կարող են բնակարանի ամրագրումն իրականացնել դեռեւս մինչեւ շինարարութեան սկսելը։ Ամրագրումից մինչեւ գնման իրաւունքի վաճառքի գործարքի իրականցման պահը կարող է անցնել տեւական ժամանակ (դա ենթադրում է ընկերութեան կողմից համապատասխան թոյլտուութիւնների ստացումը, կադաստրում իրաւունքի գրանցման ընթացակարգ եւ այլն)»։
Թեեւ մենք մեր հարցերը «Ջերմուկ գրուպ» ՓԲ ընկերութեան տնօրենին ուղղել էինք կոնկրէտ Արշակունեաց պողոտայ 18/4 հասցէի «Դ» մասնաշէնքում գտնուող բնակարանի գնման գործարքի վերաբերեալ, կառուցապատող ընկերութեան տնօրէնը անորոշ եւ ընդհանրական ձեւակերպումներով պատասխան էր ուղարկել։
Այդուհանդերձ մենք եւս մի քանի հարց ուղղեցինք «Ջերմուկ գրուպ» ՓԲԸ-ի տնօրէն Վլադիմիր Պողոսեանին, որոնցից գլխաւորը հետեւեալն էր․ «Ե՞րբ է տեղի ունեցել Արշակունեաց պողոտայ 18/4 հասցէի համալիրի «Դ» մասնաշէնքի 94 նախագծային բնակարանի ամրագրումը»։ Տրամադրել պատասխանը հաւաստող փաստաթուղթ, տեղեկանք, գրութիւն, որը լրացուցիչ ստուգման կարիք չի ունենայ»։
«Ջերմուկ գրուպ» ՓԲԸ-ի տնօրէնը մեր այս հարցին փաստացի չի պատասխանել։
«Անդրադառնալով ամրագրումը հաւաստող փաստաթղթերի տրամադրմանը՝ յայտնում ենք, որ ՀՀ օրէնսդրութեամբ ամրագրման որեւէ կարգ սահմանուած չէ, ամրագրումն իրականացուել է կառուցապատող «Ջերմուկ գրուպ» ՓԲ ընկերութեան ներքին շրջանառութեան փաստաթղթերով»,- մէզ ուղղուած պատասխանում գրել է ըկերութեան տնօրէն Վլադիմիր Պողոսեանը։
Աւելին, արբանեակից արուած լուսանկարներն էլ փաստում են, որ պաշտպանութեան նախարարի կողմից բնակարանի գնման գործարքի ժամանակ «Բիւրեղ» բնակելի համալիրի մասնաշէնքերից «Դ» մասնաշէնքը ամբողջութեամբ կանգուն է եղել։ Google Earth ծրագրում առկայ արբանեակային լուսանկարներից մէկը արուել է 2022 թ․ օգոստոսի 17-ին, որտեղ երեւում է շինարարութեան ընթացքը, իսկ բնակարանի վաճառքի գործարքը տեղի է ունեցել յուլիսի 27-ին՝ 20 օր առաջ։
Մեր նախորդ հրապարակման մէջ գրել էինք, որ Սուրէն Պապիկեանի կողմից 100 միլիոն դրամ էժան գնով բնակարան գնելը, հաւանաբար, կապ է ունեցել Աշոտ Արսենեանի անձով։ Նախկին պատգամաւոր Աշոտ Արսենեանը 2018 թուականիղ յետոյ արագ հրաժեշտ տուեց Սերժ Սարգսեանի քաղաքական թիմին եւ մտերմացաւ Նիկոլ Փաշինեանի իշխանութեան հետ, կասկածելի հանգամանքներում ստացաւ «Բիւրեղ» թաղամասի շինթոյլտուութիւնը, կարճուեց նրա որդու դէմ բանակից ազատուելու դէպքով յարուցուած քրէական գործը, շատ չանցած նոյն որդին «Քաղաքացիական պայմանագիր» կուսակցութեան միջոցով ստանձնեց Ջերմուկ համայնքի ղեկավարի պաշտօնը։
Տիրայր Մուրադեան
Hetq.am
