Վերացնել Արցախի շրջափակումը եւ մարդասիրական օգնութիւն տրամադրել
Մենք ականատես կը լինենք, որ յաջորդ Հայոց ցեղասպանութիւնը տեղի կունենայ մեր աչքի առաջ, եթէ Միացեալ Նահանգների կառավարութիւնը եւ բոլոր աշխարհը չգործեն Ադրբեջանին պատասխանատուութեան ենթարկելու, օգնութիւնների փոխադրական ընթացքը ապահովելու և Արցախի ժողովրդի ինքնորոշման իրաւունքը իր ժողովրդավարական հայրենիքում ապահովելու ուղղութեամբ
Փոլ Գրիգորեան — Լոս Անջելըսի քաղաքային խորհրդի նախագահ
ԼՈՍ ԱՆՋԵԼԵՍ (10 փետրուար, 2023) — Փոլ Գրիգորեանի տարածած յայտարարութիւնից տեղեկանում ենք, որ այսօր Լոս Անջելեսի քաղաքային խորհուրդը միաձայնութեամբ հաստատել է մի բանաձեւ դատապարտելով Հայաստանի եւ Արցախի դէմ Ադրբեջանի ագրեսիան եւ Լաչինի միջանցքի անօրինական շրջափակումը։
Բանաձեւը կոչ է անում Միացեալ Նահանգներին դադարեցնել Ադրբեջանին տրամադրուող բոլոր օգնութիւնները, անյապաղ մարդասիրական օգնութիւն տրամադրել Արցախի ժողովրդին եւ ուժային գործողութիւններ ձեռնարկել Լաչինի միջանցքը բացելու եւ Հայաստանի եւ Արցախի միջեւ անվտանգ անցում ապահովելու համար։ Բանաձեւը նաեւ կոչ է անում Միացեալ Նահանգներին շօշափելի գործողութիւններ ձեռնարկել՝ Ադրբեջանի վարչակարգին Արցախի անօրինական շրջափակման համար պատասխանատուութեան ենթարկելու համար:
Յայտարարութեան համաձայն «2022 թուականի դեկտեմբերի 12-ից Ադրբեջանը փակել է մուտքը դէպի Լաչինի միջանցք՝ Արցախի ժողովրդավարական Հանրապետութիւնը Հայաստանին եւ արտաքին աշխարհին կապող միակ ճանապարհը։ Ռուսական «խաղաղապահ» զօրքերը, որոնք պատասխանատու են Լաչինի միջանցքի պահպանման համար, թոյլ են տուել Ադրբեջանին շրջափակել այն՝ դրանով իսկ դադարեցնելով սննդի, վառելիքի, դեղորայքի եւ մարդասիրական այլ մատակարարումների բոլոր հասանելիութիւնը: Դպրոցները հարկադրուած են փակուել, խանութների դարակները դատարկ են, իսկ հիւանդանոցները չէն կարող բժշկական պարագաներ ձեռք բերել կամ կենսական նշանակութեան ընթացակարգեր կատարել: Այժմ Արցախում 120,000 էթնիկ հայ տղամարդիկ, կանայք եւ երեխաներ ցրտահարութեան, սովի կամ բժշկական օգնութեան բացակայութեան պատճառով դանդաղ մահուան են բախւում»:
«Առանց Լաչինի միջանցքի Արցախն ամբողջութեամբ շրջափակուած է բռնապետի ռազմական ուժերով, ով հետեւողականօրէն յայտարարել է հայերին քարտէզից ջնջելու իր մտադրութեան մասին»,- ասել է քաղաքային խորհրդի նախագահ Փոլ Գրիգորեանը։ «Աշխարհի մարդիկ պէտք է արթնանան այս մասին: Մենք ականատես կը լինենք, որ յաջորդ Հայոց ցեղասպանութիւնը տեղի կունենայ մեր աչքի առաջ, եթէ Միացեալ Նահանգների կառավարութիւնը եւ բոլոր աշխարհը չգործեն Ադրբեջանին պատասխանատուութեան ենթարկելու, օգնութիւնների փոխադրական ընթացքը ապահովելու և Արցախի ժողովրդի ինքնորոշման իրաւունքը իր ժողովրդավարական հայրենիքում ապահովելու ուղղութեամբ»։
