Հիմնական շեշտը դնում են նրա վրայ, որ տեսէք՝ զօրամասեր են վաճառւել, բայց դատախազը այսօր նշեց, որ դրանք չգործող զօրամասեր են եղել, հետեւաբար տեղի չէ շեշտադրումը, որ Նախիջեւանի սահմանին զօրամաս է վաճառւել: Այս մասին այսօր՝ փետրւարի 7-ին, ԱԺ-ում լրագրողների հետ զրոյցում նշեց ԱԺ «Հայաստան» խմբակցութեան պատգամաւոր Գեղամ Մանուկեանը՝ անդրադառնալով «Հայաստան» խմբակցութեան ղեկավար Սէյրան Օհանեանի նկատմամբ քրէական հետապնդում յարուցելու թոյլտւութիւն ստանալու հարցին, որով ԱԺ է եկել գլխաւոր դատախազը: Գրում է News.am-ը:
«Ես բերել եմ մի փաստաթուղթ, 2022-ի ապրիլի 15-ի՝ Նիկոլ Փաշինեանի ստորագրութեամբ: ՊՆ-ի թւով 71 գոյք փոխանցւում է պետական գոյքի կառավարման կոմիտէին, որ յետոյ օտարւի, վաճառւի: Այստեղ 71 զօրամասի հասցէ է, «ստալիչնի պոլկ»-ն էլ մէջը, տարբեր քաղաքների զօրամասեր: Հիմա ի՞նչ յայտարարենք, որ զօրամասեր են վաճառւո՞ւմ: Ոչ, պարզապէս այս զօրամասերը չգործող են եւ նոյնիսկ դրանց պահպանութիւնը ՊՆ-ի համար բեռ է, դրա համար դրւել է վաճառքի»,- ասաց պատգամաւորը:
Դիտարկմանը, որ գլխաւոր դատախազը յայտարարեց, որ դրանք պետական շահի տեսանկիւնից չեն օտարւել, Մանուկեանն ասաց. «Արշակունեաց պողոտաի վրայ եղած 6 հեկտարանոց զօրամասը վաճառւելը պետական շահի տեսանկիւնի՞ց է, թէ ոչ: Կրկնում եմ՝ խօսքը երկու չգործող փոքր զօրամասի մասին է: Շատերը Արարատի ճանապարհին կը տեսնեն, մինչեւ հիմա անխնամ մնացել են, որոնք իրենց ֆունկցիան վաղուց աւարտած են եղել: Դրանք համարենք պետական շահին վնա՞ս, թէ ոչ: Սա պարզապէս շոու է: Հիմա ես հրապարակեմ 71 անուն գոյք ու ասեմ՝ Սուրէն Պապիկեանը վաճառե՞լ է: Քանի որ չգործող զօրամաս է, ՊՆ-ն նպատակայարմար չի գտնում իր հաշւեկշռում պահել՝ հոսանք ծախսի, պահակ պահի»:
Ինչ վեաբերում է նրան, որ շուկայականից անհամեմատ ցածր գնով է վաճառւել, Գեղամ Մանուկեանն ասաց. «Չեմ ուզենայ մանրանալ, աւելի լաւ է կադաստրի մասնագէտներին դիմել: Նորից եմ վերահաստատում, Ազատ գիւղում տեղի ունեցած ողբերգութեան յաջորդ օրը գլխաւոր դատախազը եկել էր Սէյրան Օհանեանի եւ մի քանի օր յետոյ Արմէն Չարչեանի միջնորդութեամբ: Երկու շաբաթ իրենք որեւէ իրաւական գործընթաց չէին արել, այսօր միայն ԱԺ-ն կարող էր այդ հարցը քննարկել, ինչո՞ւ երկու շաբաթ առաջ եկան: Հասարակութեան ուշադրութիւնը շեղելու համար:
Տարիներ կանցնի, Աննա Վարդապետեանի փոխարէն կը լինի երեւի Վիշինսկայա ազգանունով դատախազը, եւ Սուրէն Պապիկեանին Նիկոլ Փաշինեանի հետ կը գամի անարգանքի սիւնին՝ «ստալիչնի պոլկը» վաճառելու համար, որը անարդար է: Տայ Աստւած, հետագայում Հայաստանում նման էժանագին շոուներով իշխանութիւնը չծանրաբեռնի իր աշխատանքը»:
Նա համոզմունք յայտնեց, որ իշխանութիւնը չի գնայ Սէյրան Օհանեանի կալանաւորմանը. «Խելագարութեան սահման կայ: Իշխանութիւնները խելագարութեան սահմանները շատ են անցել, բայց կարծում եմ՝ այս դէպքում չեն անցնի»:
