ԱԺ «Պատիւ ունեմ» խմբակցութեան քարտուղար Տիգրան Աբրահամեանը գրում է․
«Արցախում մարդկանց աւելի շատ զայրացնում է որոշակի պարբերականութեամբ ակտիւացող ներքաղաքական ինտրիգները, քան բուն շրջափակումով պայմանաւորուած բարդութիւնները:
Աթոռակռիւ, բամբասանք, ամբիցիաներ, ինտրիգ, արտօնութիւնների եւ դիրքի համար պայքար, անիմաստ լարուածութիւն եւ հասարակութեան բեւեռացման մեծ վտանգ. սրանք այն երեւոյթներն են, որոնք յատկապէս այսպիսի ծանր իրավիճակներում չպէտք է տեղ գտնէն արցախեան իրականութիւնում:
Արցախն իր գոյութեան ամենադժուար ժամանակներն է ապրում, որի պայմաններում առաջին պլան պէտք է գայ պայքարը, յամառութիւնը, համերաշխութիւնը, ուժերի գերլարումն ու ռեսուրսների համախմբումը հանուն մէկ նպատակի` Արցախի ու արցախցիների գոյութեան:
Արցախցին գիտի պայքարել, իր գոյութիւնը պաշտպանել, դիմակայել դժուարութիւններին, բայց տանել չի կարողանում սուտը, կեղծիքը, անազնւութիւնը, երեսպաշտութիւնն ու դաւաճանութիւնը»:
