էՋՄԻԱԾԻՆ, 1 ՀՈՒՆՎԱՐԻ, ԱՐՄԵՆՊՐԵՍ: Ն․Ս․Օ․Տ․Տ․ Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը եպիսկոպոսաց դասի եւ Մայր Աթոռ Սուրբ Էջմիածնի միաբանների հետ Յունուարի 1-ին այցելել է «Եռաբլուր» զինուորական պանթէոն՝ յարգանքի տուրք մատուցելու հայրենիքի անկախութեան եւ պաշտպանութեան համար իրենց կեանքն ընծայաբերած հաեորդիների յիշատակին:
Վեհափառ Հայրապետը եւ հոգեւորականաց դասն աղօթք են բարձրացրել առ Աստուած նահատակ քաջորդիների հոգիների խաղաղութեան համար:
Նորին Սրբութիւնն ու եկեղեցականներն առանձնաբար այցելել են նաեւ ազգի հերոս զաւակների շիրիմներին՝ բերելով իրենց խոնարհումն ու աղօթքը։
Նախապէս Դեկտեմբեր 31ին Ն.Ս.Օ.Տ.Տ. Գարեգին Բ Ամենայն Հայոց կաթողիկոսը ուղերձ էր յղել Ամանորի առիթով։
Ուղերձում նշուած է. «Սիրելի բարեպաշտ ժողովուրդ ի Հայաստան, յԱրցախ եւ ի սփիւռս,
Մայր Աթոռ Սուրբ Էջմիածնից Հայրապետական Մեր օրհնութիւնը, սէրն ու բարեմաղթանքներն ենք բերում ամենքիդ։
Նոր տարուայ սեմին ենք մեր սպասումներով ու յոյսէրով, նաեւ անհանգիստ սրտով ու մտահոգութիւններով։ Անցնող տարին մեր ժողովրդի համար զերծ չեղաւ տագնապներից, ունեցանք նոր զոհեր ու կորուստներ։ Հայրենիքը տակաւին կանգնած է անվտանգային մարտահրաւէրների առջեւ․ թշնամական նշանառութեան տակ են մեր սահմաններն ու խաղաղ բնակավայրերը։ Արցախաբնակ Մեր զաւակները աննկուն ոգով շարունակում են պայքարել հանուն իրենց անկախ կեանքի իրաւունքի պաշտպանութեան՝ դիմագրաւելով բազում նեղութիւնների՝ նաեւ Լաչինի ճանապարհի արգելափակումով պայմանաւորուած։ Այսպիսի դժուարին իրավիճակում մենք չենք կարողացել մեր ազգային ներուժով լիարժէք միաբանուել հայրենիքը զօրացնելու եւ ծանր կացութիւնից դուրս բերելու համար։ Այսօր աշխարհն ալեկոծող աշխարհաքաղաքական սուր դիմակայութիւնները, որ տեղիք են տուել հոգեւոր, սոցիալական եւ տնտեսական բազմազան խնդիրների, նոյնպէս իրենց անմիջական ներգործութիւնն են ունենում մեր տարածաշրջանում ծաւալուող զարգացումների վրայ։
Այդուհանդերձ, առ Աստուած ապաւինութեամբ Ամանորի այս երեկոյ մենք բարեմաղթանքներ ենք ուղղում միմեանց։ Բարեմաղթանքներ՝ աշխարհի խաղաղութեան, մեր հայրենիքի՝ Հայաստանի եւ Արցախի ապահւութեան ու առաջընթաց կեանքի։ Մեր հոգում առաւելաբար ակնկալիքներն են մեր կորուստների վերականգնման, յառնած խնդիրների յաղթայարման եւ ազգային մեր կեանքի նորոգութեան։
Սիրելինէր, քրիստոնեայի առաքելութիւնն է ապրել յոյսով եւ լինել լաւատես՝ համոզումով, որ, ինչպէս ասում է առաքեալը, «յոյսը երբեք չի ամաչեցնում» (Հռ. 5. 5)։ Պետութիւնները կործանւում են, ժողովուրդները անյետանում ոչ թէ փորձութիւնների ծանրութիւնից, այլ յոյսի սպառումից, ապագայի հանդէպ տեսլականի եւ այն կեանքի կոչելու վճռականութեան բացակայութիւնից: Մեր ժողովրդի հարագնայ երթը եղել է ու պիտի շարունակի մնալ Քրիստոսախարիսխ հաւատքի, յոյսի ու լաւատեսութեան պատմութիւն: Այս վստահութեամբ ապրենք ու գործենք՝ ամրօրէն կառչած մեր ինքնութեանը, մեր լինելիութեան անփոխարինելի գրաւականներին՝ հայրենիքին, մեր լեզուին ու մեր հաւատքին: Հեռու վանենք մէզանից վհատութիւնը, ապազգայնութիւնն ու անտարբերութիւնը եւ յուսառատութեամբ համախմբուենք ազգային ու պետական շահերի շուրջ։ Գիտակցենք, որ այս է ուղին մեր վիրաւոր հայրենիքի ապաքինման, Արցախի մեր ժողովրդի ինքնորոշման իրաւունքի պաշտպանութեան, հայրենիք-սփիւռք միասնականութեամբ լուսաւոր գալիքի երաշխաւորման եւ ազգիս յարատեւութեան։ Ուստի, առաքելական յորդորով «արթու՛ն լինենք եւ սիրոյ ու հաւատի զրահները հագնենք եւ փրկութեան յոյսի սաղաւարտը դնենք» (Ա Թես. 5. 8-9):
Հայրապետիս աղօթքն է, որ Ամենակարողն Աստուած խաղաղութեան մէջ պահի մեր հայրենիքը եւ անփորձանք՝ հայրենեաց պաշտպան մեր զինուորներին։ Տիրոջ օրհնութիւնն ու մխիթարութիւնն ենք հայցում ծանր կորուստներ կրած ընտանիքներին, ապաքինութիւն՝ վիրաւորներին, շուտափոյթ վերադարձ՝ գերեւարուած ու անյայտ կորած մեր զաւակներին։
Ամանորի սեմին միասնաբար հայցենք Ամենակալից, որ նոր տարում մեր ժողովրդին ի Հայաստան, յԱրցախ եւ ի սփիւռս պահպանի խաղաղ ու ապահով, սիրով միասնական ու շնորհի հայրենաշէն ու ազգաշահ իրագործումներ։ Թող Տերը մեր կեանքում առատացնի յոյսը մեր հայրենիքի ու ազգի ապագայի հանդէպ։ Եւ թող Աստծոյ սէրն ու շնորհները այսօր եւ միշտ ուղեկից լինէն մէզ եւ ամենքին:
Օրհնեալ, բարի նոր տարի։
